انڈر 19 ورلڈ کپ: پاکستان کا آج انگلینڈ سے پہلا مقابلہ

ہرارے: (پاک ترک نیوز)ایشین چیمپئن پاکستان انڈر 19 کرکٹ ٹیم آئی سی سی مینز انڈر 19 کرکٹ ورلڈ کپ 2026 میں اپنی مہم کا آغاز آج انگلینڈ کے خلاف میچ سے کرے گی۔
افتتاحی مقابلہ زمبابوے کے دارالحکومت ہرارے میں واقع تاکاشنگا اسپورٹس کلب میں کھیلا جائے گا۔پاکستان ٹیم حال ہی میں دبئی میں ہونے والا اے سی سی انڈر 19 ایشیا کپ بھارت کو 191 رنز سے شکست دے کر جیت چکی ہے، جبکہ زمبابوے میں منعقدہ سہ فریقی سیریز میں بھی میزبان ٹیم کو 9 وکٹوں سے شکست دی تھی۔
قومی ٹیم اسی شاندار فارم کو برقرار رکھتے ہوئے تیسری بڑی ٹرافی جیتنے کے عزم کے ساتھ میدان میں اترے گی۔پاکستان اس سے قبل 2004 اور 2006 میں آئی سی سی انڈر 19 ورلڈ کپ جیت چکا ہے اور اس بار تیسرا عالمی اعزاز حاصل کرنے کے لیے پرعزم ہے۔
آئی سی سی انڈر 19 ورلڈ کپ 15 جنوری سے 6 فروری تک نمیبیا اور زمبابوے میں کھیلا جائے گا۔ 16 ٹیموں پر مشتمل اس ٹورنامنٹ میں پاکستان کو گروپ ‘سی’ میں رکھا گیا ہے، جہاں وہ 19 جنوری کو اسکاٹ لینڈ اور 22 جنوری کو زمبابوے کے خلاف اپنے گروپ میچز کھیلے گا۔ تینوں میچز تاکاشنگا اسپورٹس کلب میں ہوں گے۔
ٹورنامنٹ کا سپر سکس مرحلہ 24 جنوری سے یکم فروری تک ہرارے اور بولاوایو میں کھیلا جائے گا، جبکہ سیمی فائنلز 3 اور 4 فروری کو ہوں گے۔ فائنل میچ 6 فروری کو ہرارے اسپورٹس کلب میں کھیلا جائے گا۔
ورلڈ کپ سے قبل پاکستان انڈر 19 ٹیم نے بھرپور تیاری کی۔ بنگلہ دیش کے خلاف پہلا وارم اپ میچ بارش کی نذر ہو گیا، جبکہ دوسرے وارم اپ میچ میں پاکستان نے امریکا کو 69 رنز سے شکست دی۔
15 رکنی اسکواڈ کی قیادت فرحان یوسف کر رہے ہیں۔ اس اسکواڈ میں صرف فاسٹ بولر علی رضا ایسے کھلاڑی ہیں جو 2024 کے انڈر 19 ورلڈ کپ میں پاکستان کی نمائندگی کر چکے ہیں، جہاں انہوں نے 9 وکٹیں حاصل کی تھیں۔
پاکستان ٹیم آج بولاوایو سے ہرارے روانہ ہوگی اور جمعرات کو پریکٹس سیشن کرے گی۔پاکستان انڈر 19 ٹیم کے کپتان فرحان یوسف کا کہنا ہے کہ ملتان میں لگنے والے طویل کیمپ، ایشیا کپ اور سہ فریقی سیریز کی کامیابیوں نے ٹیم کے اعتماد کو بلند کیا ہے اور کھلاڑی ورلڈ کپ میں بہترین کارکردگی دکھانے کے لیے مکمل طور پر تیار ہیں۔