اسلام آباد: (پاک ترک نیوز)پاکستان ٹیلی کمیونیکیشن اتھارٹی (پی ٹی اے) نے ملک بھر میں براڈبینڈ سہولیات کے فروغ اور مقامی سطح پر کاروباری مواقع بڑھانے کے لیے ضلع کی سطح پر انٹرنیٹ سروس فراہم کرنے کے لیے کلاس لائسنس جاری کرنے کا باقاعدہ آغاز کر دیا ہے۔
اس اقدام کا مقصد مقامی کاروباری افراد کی حوصلہ افزائی کرنا اور پاکستان میں انٹرنیٹ تک رسائی کو مزید وسیع کرنا ہے، تاکہ دور دراز اور کم ترقی یافتہ علاقوں میں بھی براڈبینڈ سروسز دستیاب ہو سکیں۔
پی ٹی اے کے فریم ورک کے تحت یہ کلاس لائسنس 10 سال کی مدت کے لیے جاری کیا جائے گا۔ درخواست گزار کو ایک مرتبہ ابتدائی لائسنس فیس کی مد میں 3 لاکھ روپے ادا کرنا ہوں گے۔
اس کے علاوہ پہلے سال کے لیے ایک لاکھ روپے سالانہ لائسنس فیس (Annual License Fee) بھی ابتدائی فیس کے ساتھ لائسنس کے نفاذ سے قبل ادا کرنا لازمی ہو گی۔
پی ٹی اے کے مطابق بعد کے برسوں میں سالانہ لائسنس فیس پیشگی ادا کرنا ہو گی، جس میں ہر سال 10 فیصد اضافہ کیا جائے گا۔دلچسپی رکھنے والے افراد اور اداروں کو ہدایت کی گئی ہے کہ وہ مقررہ چیک لسٹ کے مطابق اپنی درخواستیں مکمل کریں اور پی ٹی اے کے آن لائن پورٹل کے ذریعے جمع کروائیں۔
لائسنس کا مکمل مسودہ (ٹیمپلیٹ) بھی پی ٹی اے کی سرکاری ویب سائٹ پر دستیاب ہے۔پی ٹی اے کا کہنا ہے کہ ادارہ ڈیجیٹل شمولیت کے فروغ، براڈبینڈ انفراسٹرکچر کو مضبوط بنانے اور ملک بھر میں ٹیلی کمیونیکیشن سیکٹر کی ترقی کے لیے اپنے عزم پر قائم ہے۔
پی ٹی اے کا بڑا اقدام: اضلاع کی سطح پر انٹرنیٹ لائسنس جاری کرنے کا آغاز
