پنجشیر میں نیشنل ریزسٹنس فرنٹ نے طالبان کا اہم مرکز تباہ کر دیا ، 17 ہلاک

کابل ( پاک ترک نیوز) افغانستان کے صوبے پنجشیر میں نیشنل ریزسٹنس فرنٹ (این آر ایف) نے طالبان کے ایک اہم مرکز پر کارروائی کرتے ہوئے 17 طالبان جنگجوؤں کو ہلاک کر دیا۔
ہلاک ہونے والوں میں ایک بٹالین کے چیف آف اسٹاف بھی شامل ہے۔ آپریشن 7 دسمبر کی شب ضلع درہ کے علاقے عبداللہ خیل کی وادی میں واقع طالبان کے مضبوط گڑھ منجستو گاؤں میں کیا گیا۔کارروائی شام 6 بجے دو مراحل میں ہوئی ، پہلے بارودی سرنگ کا دھماکا کیا گیا جس کے فوراً بعد راکٹوں سے حملہ کیا گیا۔
حکام کا کہنا ہے کہ یہ مرکز طالبان کی وزارتِ دفاع کی اسپیشل بریگیڈ کا اہم بیس تھا جہاں تعینات جنگجو مقامی آبادی کو مسلسل ہراساں اور تشدد کا نشانہ بناتے تھے۔ حملے میں طالبان کا پورا بیس مکمل تباہ ہو گیا۔
این آر ایف کے مطابق آپریشن میں این آر ایف کا کوئی نقصان نہیں پہنچا، جبکہ طالبان کے پانچ جنگجو شدید زخمی بھی ہوئے۔