لندن (پاک ترک نیوز )برطانیہ کے شہر گرِمزبی کے ڈیانا، پرنسز آف ویلز اسپتال میں مریضوں کی سہولت اور طبی خدمات میں اضافے کے لیے تیسری ایم آر آئی مشین نصب کردی گئی۔
اسپتال کی سہولیات میں 20 لاکھ پاؤنڈ کی توسیع کے منصوبے کے تحت نئی مشین فراہم کی گئی ہے، جس سے روزانہ 20 سے 25 اضافی مریضوں کے ایم آر آئی اسکین کیے جا سکیں گے۔
اسپتال کی شعبہ امیجنگ کی منتظم ایو لیگٹ کے مطابق نئی مشین پہلے استعمال ہونے والی موبائل مشین کی جگہ لے گی، جبکہ نئی سہولت ایسے مریضوں کے لیے بھی زیادہ موزوں ہے جنہیں چلنے پھرنے میں مشکلات کا سامنا ہوتا ہے۔
ان کا کہنا تھا کہ تینوں مشینیں ایک ہی جگہ موجود ہونے سے مریضوں کو آنے جانے میں آسانی ہوگی اور انہیں بہتر ماحول میسر آئے گا۔
اسپتال انتظامیہ کے مطابق ہر مشین کے ذریعے روزانہ تقریباً 20 سے 25 مریضوں کے اسکین کیے جا سکتے ہیں، جبکہ ایک اسکین مکمل ہونے میں 20 منٹ سے ایک گھنٹے تک کا وقت لگتا ہے۔
تیسری مشین کی تنصیب کے بعد اسپتال میں روزانہ تقریباً 60 مریضوں کے اسکین کرنے کی گنجائش پیدا ہوگئی ہے، جس سے مریضوں کی طویل انتظار کی فہرست کم کرنے میں مدد ملے گی۔
واضح رہے کہ اسپتال کی موجودہ عمارت 2021 میں دو ایم آر آئی مشینوں، مریضوں کے لیے مخصوص تبدیلیِ لباس کے کمروں اور صحت یابی کے مرکز کے ساتھ قائم کی گئی تھی۔
