گرین کلائمیٹ فنڈ نے پاکستان کیلئے 25 کروڑ ڈالر کی منظوری دیدی

اسلام آباد ( پاک ترک نیوز) دنیا بھر میں ماحول کی بہتری کے لیے کام کرنے والی تنظیم گرین کلائمیٹ فنڈ نے پاکستان کیلئے 25 کروڑ ڈالر امداد منظور کر لی ہے۔
ایشیائی ترقیاتی بینک کے اعلامیے کے مطابق گرین کلائمیٹ فنڈ کی رقم کو گلیشیئرز ٹو فارمز منصوبے کے لیے استعمال کیا جائے گا، منصوبے کےتحت گلیشیئرزسے نکلنے والے آبی نظاموں کو ماحولیاتی اثرات سے نمٹنے کے لیے مدد فراہم کی جائے گی۔
اعلامیے کے مطابق امداد سے سوات میں کسانوں کو زراعت اور آبپاشی کی سہولیات فراہم کی جائیں گی ، منصوبہ ایشیائی بینک کی معاونت سے مکمل کیا جائے گا۔
اعلامیے میں بتایا گیا کہ یہ پروگرام ایشیائی ترقیاتی بینک کی قیادت میں پاکستان سمیت 9 ممالک میں شروع ہو گا، اس منصوبے کا مقصد گلیشیئر پر انحصار کرنے والے خطوں میں پانی اور زراعت کے نظام کو مضبوط بنانا ہے۔
اعلامیے میں مزید بتایا گیا ہے کہ اے ڈی بی آئندہ 10 برس میں منصوبوں پر 3.25 ارب ڈالر کی سرمایہ کاری کرے گا ، منصوبے کے تحت مؤثر آبپاشی، پانی ذخیرہ اور واٹر شیڈ مینجمنٹ کو فروغ دیا جائے گا۔