واشنگٹن ( پاک ترک نیوز) امریکی صدر ڈونلڈ ٹرمپ نے دعویٰ کیا ہے کہ ایران ایسے میزائل تیار کر چکا ہے جو یورپ تک پہنچ سکتے ہیں اور سان ڈیاگو، لاس اینجلس سمیت امریکا کے دیگر شہروں کو بھی نشانہ بنانے کی صلاحیت رکھتے ہیں۔امریکی ریاست مسیسیپی میں انتخابی ریلی سے خطاب کرتے ہوئے ٹرمپ نے کہا کہ امریکا نے ایران کے ساتھ جنگ شروع نہیں کی بلکہ ایران نے امریکا کے خلاف جنگ شروع کی۔امریکی صدر نے فوجی کارروائی کے معاشی اثرات کا دفاع کرتے ہوئے کہا کہ انہیں توقع تھی کہ جنگ کے باعث تیل کی قیمتیں موجودہ سطح سے کہیں زیادہ بڑھ جائیں گی، تاہم قیمتیں توقع کے برعکس اب پہلے سے کم ہیں۔
یہ بھی پڑھیں: یومِ سیاہ کشمیر، پاکستان کا کشمیری عوام کے ساتھ یکجہتی کا اظہار
ٹرمپ کا کہنا تھا کہ وہ اس کارروائی کے لیے پوری طرح تیار تھے کیونکہ امریکا کے پاس کوئی دوسرا راستہ نہیں تھا۔ ان کے مطابق ایران کے خلاف یہ کارروائی بہت پہلے ہونی چاہیے تھی۔جنگ بندی کے حوالے سے امریکی صدر نے کہا کہ انہیں ابتدا ہی سے یہ انتظام زیادہ پسند نہیں تھا۔ امریکا نے جنگ بندی کرکے اچھا بننے کی کوشش کی، لیکن ان کے خیال میں یہ محض وقت کا ضیاع ثابت ہوئی۔ٹرمپ نے دعویٰ کیا کہ امریکی بحری ناکہ بندی کے باعث ایران مشکلات کا شکار ہے اور ایران کے خلاف امریکی کارروائی ناگزیر تھی۔ انہوں نے اپنی پہلی صدارتی مدت کے دوران ایرانی جنرل قاسم سلیمانی کو ہلاک کرنے کا بھی ذکر کیا اور کہا کہ آبنائے ہرمز پر امریکا کا مکمل کنٹرول ہے۔
