اوندو(پاک ترک نیوز )نائجیریا کی جنوب مغربی ریاست اوندو میں فضائیہ کا ایک طیارہ گر کر تباہ ہوگیا، حادثے میں طیارے میں سوار تمام 32 افراد جاں بحق ہوگئے۔نائجیریا کے صدر بولا ٹینوبو نے طیارہ حادثے پر گہرے دکھ اور افسوس کا اظہار کرتے ہوئے متاثرہ خاندانوں سے تعزیت کی ہے۔نائجیرین فضائیہ کے مطابق طیارہ معمول کے مشن پر جنوبی نائجیریا کے شہر بینن سٹی سے معاشی مرکز لاگوس کی جانب روانہ ہوا تھا۔
طیارہ مقامی وقت کے مطابق صبح تقریباً 9 بجے اوندو ریاست کے علاقے اِگبوکوڈا میں حادثے کا شکار ہوا۔صدارتی دفتر کے مطابق طیارے میں 25 مسافر اور عملے کے 7 ارکان سوار تھے، تاہم حادثے میں کوئی بھی شخص زندہ نہ بچ سکا۔نائجیریا کے وزیر ہوا بازی فیسٹس کیامو کے مطابق طیارہ ایک بحری اڈے کے قریب گر کر تباہ ہوا۔ حادثے کے فوری بعد امدادی ٹیمیں جائے وقوعہ پر پہنچ گئیں اور امدادی کارروائیاں شروع کردیں۔
یہ بھی پڑھیں: امریکی فضائیہ کا تیز رفتار میزائلوں کے لیے جدید انجن تیار کرنے کا منصوبہ
حکام کے مطابق طیارہ حادثے کی وجوہات فوری طور پر معلوم نہیں ہوسکیں۔ صدر بولا ٹینوبو نے نائجیرین فضائیہ کو واقعے کی مکمل اور فوری تحقیقات کا حکم دے دیا ہے تاکہ حادثے کی اصل وجہ معلوم کی جاسکے اور مستقبل میں ایسے واقعات کی روک تھام کے لیے اقدامات کیے جائیں۔
