پشاور(پاک ترک نیوز )وزیراعلیٰ خیبر پختونخوا سہیل آفریدی نے کہا ہے کہ 4 اکتوبر کا لانگ مارچ ہر حال میں ہوگا۔
پریس کانفرنس سے خطاب کرتے ہوئے وزیراعلیٰ نے حکومتی مخالفین کو تنقید کا نشانہ بناتے ہوئے کہا کہ یہ مسخرے اپنی حرکتوں سے قوم کا دھیان اصل مسائل سے بھٹکا رہے ہیں۔
ان کا کہنا تھا کہ جن لوگوں نے انہیں لایا، وہ خود جان اور مان چکے ہیں کہ ان سے بڑی غلطی ہوئی۔
وزیراعلیٰ نے ملکی معیشت کا ذکر کرتے ہوئے کہا کہ 2022 میں حکومت کی تبدیلی سے پہلے پاکستان کی جی ڈی پی شرح نمو بڑھ رہی تھی، لیکن آج چار سال بعد جی ڈی پی کی شرح نمو انتہائی نیچے گر چکی ہے۔
انہوں نے کہا کہ چار پانچ سال سے دعوے کرنے والے غلط ثابت ہوئے ہیں۔
وزیراعلیٰ کے مطابق افغانستان ہمارا ہمسایہ ملک ہے جو چار دہائیوں سے جنگ کی حالت میں رہا، لیکن وہ ترقی کر رہا ہے جبکہ پاکستان پیچھے رہ رہا ہے۔
انہوں نے دعویٰ کیا کہ افغانستان کی جی ڈی پی شرح نمو پاکستان سے زیادہ ہے۔
وزیراعلیٰ نے کہا کہ افغانستان میں جب سے وہاں کی حکومت نے معاملات سنبھالے ہیں، وہ ترقی کر رہے ہیں جبکہ پاکستان پیچھے جارہا ہے، یہاں تک کہ ملک میں فی کس آمدنی بھی کم ہوئی ہے۔
انہوں نے ملکی قرضوں پر بات کرتے ہوئے کہا کہ پاکستان کا اندرونی اور بیرونی قرضہ 43 ہزار ارب روپے تھا، جو گزشتہ پانچ برسوں میں بڑھ کر 100 ٹریلین روپے سے تجاوز کرنے کے قریب پہنچ گیا ہے۔
