راولپنڈی(پاک ترک نیوز ) حنا جاوید قتل کیس کی تفتیش کا ازسرِنو جائزہ لینے کے لیے پنجاب حکومت نے اعلیٰ سطحی کمیٹی تشکیل دے دی۔ذرائع کے مطابق کمیٹی وزیراعلیٰ پنجاب مریم نواز شریف کی ہدایت پر قائم کی گئی ہے، جس کی سربراہی ڈی جی سی سی ڈی سہیل ظفر چٹھہ کریں گے۔کمیٹی میں ڈی آئی جی لاہور شعیب خرم اور ایس ایس پی انویسٹی گیشن راولپنڈی سیف اللہ بھی شامل ہیں۔
ذرائع کا کہنا ہے کہ سہیل ظفر چٹھہ کی سربراہی میں اعلیٰ سطحی کمیٹی رواں ہفتے راولپنڈی کا دورہ کرے گی، جہاں جائے وقوعہ کا معائنہ کرنے کے ساتھ اب تک ہونے والی تفتیش کا بھی تفصیلی جائزہ لیا جائے گا۔ذرائع کے مطابق حنا جاوید قتل کیس کے فرانزک نمونوں کی رپورٹس بھی راولپنڈی پولیس کو موصول ہوگئی ہیں، جن میں پوسٹ مارٹم رپورٹ کی حتمی رپورٹ بھی شامل ہے۔وزیراعلیٰ پنجاب کی جانب سے تشکیل دی گئی کمیٹی نے حنا جاوید کے اہلخانہ سے بھی رابطہ کرلیا ہے، جبکہ اہلخانہ نے راولپنڈی پولیس کی تفتیش پر تحفظات کا اظہار کیا ہے۔
یہ بھی پڑھیں: عرب امارات کے نائب صدر آج سعودی عرب کا دورہ کریں گے
حنا جاوید کے اہلخانہ کی جانب سے پارلیمانی کاکس کمیٹی اور قومی کمیشن برائے انسانی حقوق کو بھی خطوط لکھے گئے ہیں۔واضح رہے کہ حنا جاوید کو 21 اگست کو راولپنڈی میں ان کے گھر میں قتل کیا گیا تھا، جس کا مقدمہ تھانہ سول لائن میں درج ہے۔مقدمے میں نامزد مقتولہ کے شوہر فیصل اصغر اور گھریلو ملازم ذیشان ارشد جوڈیشل ریمانڈ پر اڈیالہ جیل میں ہیں۔
