اسلام آباد ( پاک ترک نیوز) صدر مملکت نے عالمی یوم امن کے موقع پر اپنے پیغام میں پائیدار عالمی امن کیلئے مکالمے، سفارت کاری، انصاف اور عالمی قوانین کے احترام پر زور دیا ہے۔صدر مملکت کا کہنا ہے کہ امن کے قیام کیلئے ہر سطح پر مسلسل اور مشترکہ کوششیں ضروری ہیں، پاکستان عالمی امن و سلامتی اور اقوام متحدہ کے مرکزی کردار پر مبنی مؤثر کثیرالجہتی نظام کیلئے پرعزم ہے۔انہوں نے کہا کہ پاکستان تنازعات کے پرامن حل، مکالمے، سفارت کاری اور اجتماعی اقدامات کی حمایت کرتا ہے۔ پاکستانی امن دستوں نے دنیا بھر میں اقوام متحدہ کے مشنز میں اہم خدمات انجام دی ہیں۔
صدر مملکت کے مطابق پاکستان نے ایران اور امریکا کے درمیان تنازع کے خاتمے کیلئے سفارتی کوششیں کیں، اسلام آباد مفاہمتی یادداشت نے کشیدگی میں کمی اور مذاکراتی حل کی راہ ہموار کی، جبکہ برجن اسٹاک سوئٹزرلینڈ میں اعلیٰ سطحی مذاکرات نے مفاہمتی کوششوں کو مزید آگے بڑھایا۔صدر مملکت نے کہا کہ پاکستان مکالمے کے تسلسل اور خطے سمیت دنیا میں پائیدار امن کیلئے اپنی کوششیں جاری رکھے گا۔انہوں نے کہا کہ جہاں عوام کے حق خودارادیت سے انکار ہو وہاں پائیدار امن ممکن نہیں، مقبوضہ جموں و کشمیر اور فلسطین سمیت زیر قبضہ علاقوں سے متعلق سلامتی کونسل کی قراردادوں پر عملدرآمد ضروری ہے۔صدر مملکت نے عالمی برادری پر زور دیا کہ اقوام متحدہ کے منشور اور عالمی قوانین کی پاسداری یقینی بنائی جائے اور تنازعات کے منصفانہ اور پائیدار حل کیلئے پرامن ذرائع کو فروغ دیا جائے۔
یہ بھی پڑھیں: جنگ نہیں مذاکرات سے تنازعات کا حل ممکن ہے، بلاول بھٹو زرداری کا عالمی یومِ امن پر پیغام
انہوں نے کہا کہ پاکستان مغربی ایشیا اور دیگر خطوں میں کشیدگی میں کمی کیلئے مسلسل حمایت کا مطالبہ کرتا ہے اور پرامن و خوشحال دنیا کیلئے اجتماعی کوششوں میں قابل اعتماد شراکت دار کے طور پر اپنا کردار ادا کرنے کیلئے تیار ہے۔
