لاہور( پاک ترک نیوز) وزیراعلیٰ پنجاب مریم نواز شریف سے پاکپتن کے ارکان صوبائی اسمبلی نے ملاقات کی، جس میں حلقے کے عوامی مسائل، ضروریات اور جاری ترقیاتی منصوبوں پر تفصیلی تبادلہ خیال کیا گیا۔ملاقات کرنے والوں میں فاروق احمد مانیکا، چودھری جاوید احمد، عمران اکرم اور سردار منصب علی ڈوگر شامل تھے۔ ارکان اسمبلی نے پاکپتن میں شہری اور دیہی ترقی سے متعلق مختلف تجاویز وزیراعلیٰ کے سامنے پیش کیں۔
ارکان اسمبلی نے پاکپتن میں ماحول دوست الیکٹرو بس سروس کے آغاز اور دیگر ترقیاتی منصوبے شروع کرانے پر وزیراعلیٰ مریم نواز شریف کا شکریہ ادا کیا۔ ارکان نے الیکٹرو بس منصوبے کو موجودہ دہائی کا اہم اور تبدیلی لانے والا منصوبہ قرار دیا۔ارکان اسمبلی کے مطابق پاکپتن میں پندرہ ماحول دوست الیکٹرو بسیں عوام کو معیاری سفری سہولیات فراہم کر رہی ہیں۔ تین بڑے روٹس پر چلنے والی بسوں سے روزانہ ہزاروں مسافر مستفید ہو رہے ہیں۔ جنرل بس اسٹینڈ پاکپتن سے عارف والا، بنگہ حیات اور نور پور سیال کے روٹس پر شہریوں کو سفری سہولت میسر آ رہی ہے۔ارکان صوبائی اسمبلی نے پاکپتن شہر کی خوبصورتی کے منصوبوں پر وزیراعلیٰ مریم نواز شریف اور ان کی ٹیم کو خراج تحسین پیش کیا، جبکہ پاکپتن کے لیے جدید ترین نواز شریف اسکولز آف ایمننس کے قیام پر بھی اظہار تشکر کیا۔
یہ بھی پڑھیں: چین کے لیے نامزد پاکستانی سفیر علی اسد گیلانی کی اسحاق ڈار سے ملاقات
وزیراعلیٰ مریم نواز شریف نے ارکان اسمبلی کو پاکپتن میں جاری ترقیاتی منصوبوں کے معیار، رفتار اور شفافیت پر کڑی نظر رکھنے کی ہدایت کی۔مریم نواز شریف نے کہا کہ پنجاب کے ہر شہر اور ہر گاؤں کی ترقی اور بہتری ہمارا نصب العین ہے۔ مجھے خوشی ہے کہ برسوں سے نظر انداز رہنے والا پاکپتن بھی اب ترقی کی راہوں پر گامزن ہے۔
وزیراعلیٰ نے کہا کہ وہ صوبے کے ہر شہر اور ہر علاقے میں جاری ترقیاتی منصوبوں کی خود نگرانی کر رہی ہیں اور پنجاب کو بہتر سے بہترین صوبہ بنانے کے لیے دن رات کوشاں ہیں۔
