لاہور( پاک ترک نیوز) دانتوں کی صفائی کے لیے ٹوتھ برش تو ہر گھر میں استعمال ہوتا ہے، لیکن اگر یہی ٹوتھ برش آپ کے دانتوں کو دیکھ بھی سکے، گندگی تلاش کرے اور پھر اسی جگہ خود صفائی شروع کردے تو؟
جی ہاں، ٹیکنالوجی کی دنیا میں ایسی ہی حیران کن پیش رفت سامنے آئی ہے، جہاں ڈائسن نے کیمرے اور مشین لرننگ سے لیس جدید ٹوتھ برش متعارف کرایا ہے۔مستقبل کا ٹوتھ برش، اب صرف دانت صاف نہیں کرے گا بلکہ انہیں دیکھے گا بھی۔ڈائسن کی جانب سے پیش کیے گئے CameraJet میں انتہائی چھوٹے لینز والا کیمرا نصب کیا گیا ہے، جو دانتوں کے درمیان ان جگہوں کو مسلسل مانیٹر کرتا ہے جہاں عام برش کی رسائی مشکل ہوتی ہے۔
یہ کیمرا ایک سیکنڈ میں 28 تصاویر بنا سکتا ہے۔جیسے ہی نظام کو محسوس ہوتا ہے کہ کسی مخصوص جگہ صفائی کی ضرورت ہے، تقریباً 100 ملی سیکنڈ کے اندر وہاں ماؤتھ رِنس کی ایک خاص دھار پہنچائی جاتی ہے۔یعنی برش اور واٹر فلوسنگ، دونوں سہولتیں ایک ہی ڈیوائس میں۔ڈائسن کے مطابق اس ٹیکنالوجی کو تیار کرنے میں تقریباً چھ سال لگے۔اس کے پیچھے صرف کیمرے کا کمال نہیں بلکہ مشین لرننگ اور لاکھوں لائنوں پر مشتمل کمپیوٹر کوڈ بھی استعمال کیا گیا ہے۔کمپنی کا کہنا ہے کہ اس نظام کو چار لاکھ ستر ہزار دانتوں سے متعلق تصاویر کے ذریعے تربیت دی گئی۔
یہ بھی پڑھیں: اسحاق ڈار کا ترک وزیر خارجہ سے ٹیلیفونک رابطہ، فلسطین پر مشترکہ مؤقف کا اعادہ
دلچسپ بات یہ ہے کہ CameraJet کا کیمرا صرف صفائی کے لیے استعمال نہیں ہوتا۔MyDyson ایپ کے ذریعے صارف اپنے دانتوں، خصوصاً پچھلے دانتوں کا لائیو منظر بھی دیکھ سکتا ہے۔یعنی برش کرتے ہوئے موبائل کی اسکرین پر اپنے ہی منہ کے اندر کا منظر دیکھا جاسکتا ہے۔ڈائسن کے مطابق، تقریباً دس میں سے نو افراد اتنی باقاعدگی سے فلاسنگ نہیں کرتے جتنی انہیں کرنی چاہیے۔شاید اسی مسئلے کے حل کے لیے کمپنی نے برش اور واٹر فلوسنگ کو ایک ہی ڈیوائس میں اکٹھا کردیا ہے۔عام واٹر فلوسرز میں پانی کی دھار نسبتاً نوکیلی ہوتی ہے، جبکہ CameraJet میں مخروطی شکل کی دھار استعمال کی گئی ہے۔
ڈائسن کا کہنا ہے کہ اس کا مقصد مسوڑھوں اور دانتوں پر کم دباؤ ڈالتے ہوئے پلاک کو صاف کرنا ہے۔کمپنی کے اپنے لیبارٹری ٹیسٹس کے مطابق، مشکل سے پہنچنے والی جگہوں پر صرف برش کرنے کی صورت میں بھی اس نے پریمیم الیکٹرک ٹوتھ برشز کے مقابلے میں 69 فیصد تک زیادہ پلاک ہٹایا۔رازداری کے حوالے سے ڈائسن کا کہنا ہے کہ کیمرا صرف لائیو ویو یا خودکار جیٹ چلنے کے دوران فعال ہوتا ہے، جبکہ تصاویر ڈیوائس یا کلاؤڈ میں محفوظ نہیں کی جاتیں۔
یہ ٹوتھ برش Ceramic Ultra Blue اور Ceramic Pink رنگوں میں دستیاب ہے، جبکہ آسٹریلیا میں اس کی قیمت 799 آسٹریلوی ڈالر بتائی گئی ہے۔
