اسلام آباد(پاک ترک نیوز ) بینظیر انکم سپورٹ پروگرام کے زیر استعمال سرکاری گاڑیوں اور ان کے ایندھن کے اخراجات کی تفصیلات پارلیمنٹ میں پیش کردی گئیں۔
دستاویز کے مطابق ملک بھر میں بینظیر انکم سپورٹ پروگرام کے زیر استعمال سرکاری گاڑیوں کی تعداد 75 ہے۔ ان میں سے 28 گاڑیاں بی آئی ایس پی ہیڈکوارٹرز، 12 پنجاب، 17 سندھ، 7 خیبر پختونخوا، 6 بلوچستان جبکہ 5 گاڑیاں آزاد جموں و کشمیر اور گلگت بلتستان میں زیر استعمال ہیں۔
پارلیمنٹ میں پیش کی گئی دستاویز کے مطابق گزشتہ پانچ برس کے دوران بی آئی ایس پی کے زیر استعمال سرکاری گاڑیوں نے مجموعی طور پر 8 لاکھ 10 ہزار لیٹر سے زائد ایندھن استعمال کیا۔
دستاویز کے مطابق پانچ سال کے دوران گاڑیوں کے ایندھن پر کروڑوں روپے کے اخراجات آئے۔
تفصیلات کے مطابق اسلام آباد ریجن کی گاڑیوں نے پانچ برس کے دوران 4 لاکھ 2 ہزار 400 لیٹر ایندھن استعمال کیا، جبکہ پنجاب ریجن کی گاڑیوں نے ایک لاکھ 778 لیٹر فیول خرچ کیا۔
دستاویز کے مطابق سندھ ریجن کی گاڑیوں نے پانچ سال کے دوران ایک لاکھ 82 ہزار 850 لیٹر ایندھن استعمال کیا۔
بی آئی ایس پی کے ملک بھر میں مختلف ریجنز میں زیر استعمال گاڑیوں کے ایندھن کے استعمال کی تفصیلات بھی پارلیمنٹ میں پیش کی گئی ہیں
