اسلام آباد(پاک ترک نیوز) پمز ہسپتال میں نرسری میں آتشزدگی کے سانحے کی تحقیقات اہم مرحلے میں داخل ہوگئیں، وزیراعظم شہباز شریف کی جانب سے قائم تحقیقاتی کمیٹی نے عبوری رپورٹ تیار کرلی، جو آج وزیراعظم کو پیش کی جائے گی۔
تحقیقاتی کمیٹی نے پمز ہسپتال کی نرسری سے سی سی ٹی وی ریکارڈ قبضے میں لے لیا ہے، جبکہ واقعے کے حوالے سے ڈاکٹروں، نرسنگ اسٹاف اور دیگر متعلقہ عملے کے بیانات بھی قلمبند کیے گئے ہیں۔ذرائع کے مطابق تحقیقاتی کمیٹی کی جانب سے سانحے کی وجوہات، ہسپتال کے فائر سیفٹی انتظامات، ایمرجنسی رسپانس اور ذمہ داروں کا تعین کرنے کے لیے شواہد کا جائزہ لیا گیا ہے۔
دوسری جانب پمز ہسپتال انتظامیہ نے بھی اپنی الگ چار رکنی انکوائری کمیٹی تشکیل دے دی ہے۔ کمیٹی کی سربراہی پروفیسر ڈاکٹر عاطف انعام شامی کریں گے، جبکہ تین سینیئر پروفیسر افسران بھی کمیٹی میں شامل ہیں۔ذرائع کا کہنا ہے کہ پمز کی نئی انکوائری کمیٹی میں ٹیکنیکل ڈپارٹمنٹ سے متعلق ایک بھی رکن شامل نہیں، جس پر سوالات اٹھ رہے ہیں۔ذرائع کے مطابق کمیٹی کی رکن اور ڈپٹی ایگزیکٹو ڈائریکٹر ڈاکٹر عنیزہ جلیل پہلے ہی وزیراعظم کی قائم کردہ تحقیقاتی کمیٹی کے سامنے اپنا بیان قلمبند کرا چکی ہیں۔
یہ بھی پڑھیں: مشترکہ دفاعی معاہدے سے تینوں ممالک مزید قریب آئے،وزیراعظم
اب وزیراعظم کو پیش کی جانے والی عبوری رپورٹ میں سانحے کی وجوہات، ہسپتال کے انتظامی و حفاظتی نظام میں خامیوں اور ذمہ داری کے تعین سے متعلق اہم نکات سامنے آنے کا امکان ہے۔
