اسلام آباد ( پاک ترک نیوز) وزیراعظم محمد شہباز شریف سے سعودی عرب کے وزیر ماحولیات انجینئر عبدالرحمن بن عبدالمحسن الفضلی نے ملاقات کی، وزیراعظم نے سعودی وزیر اور ان کے وفد کا خیرمقدم کیا۔وزیراعظم نے کہا کہ پاکستان اور سعودی عرب کے درمیان گہرے برادرانہ اور اسٹریٹجک تعلقات ہیں، جبکہ مکہ میں ہونے والے مشترکہ دفاعی معاہدے سے تینوں ممالک مزید قریب آئے ہیں اور پورے خطے میں اتحاد و امن کا پیغام گیا ہے۔
شہباز شریف نے کہا کہ اب دونوں ممالک کو اقتصادی اور زرعی شعبوں میں تعاون بڑھانے پر توجہ دینی چاہیے اور دیرینہ تعلقات کو مضبوط تجارتی و سرمایہ کاری شراکت داری میں تبدیل کیا جائے۔وزیراعظم نے سعودی عرب کو پاکستانی زرعی مصنوعات کی برآمدات میں اضافے پر اطمینان کا اظہار کیا۔ ملاقات میں زرعی پیداوار بڑھانے، جدید ٹیکنالوجی، تحقیق و ترقی اور پانی کے وسائل کے مؤثر استعمال کے ذریعے تعاون بڑھانے پر بھی تبادلہ خیال کیا گیا۔
یہ بھی پڑھیں: وزیراعظم شہباز شریف سے سعودی سفیر نواف بن سعید المالکی کی الوداعی ملاقات
وزیراعظم نے اعلان کیا کہ پاکستانی زرعی ماہرین کا وفد جلد ریاض کا دورہ کرے گا، جہاں دونوں ممالک کے درمیان مختلف امور پر مزید بات چیت ہوگی۔سعودی وزیر نے پرتپاک استقبال اور مہمان نوازی پر وزیراعظم کا شکریہ ادا کرتے ہوئے زراعت، پانی اور غذائی تحفظ کے شعبوں میں پاکستان کے ساتھ تعاون مزید بڑھانے کے عزم کا اعادہ کیا۔
