ریاض ( پاک تر ک نیوز) سعودی عرب اور متحدہ عرب امارات نے خطے میں جاری تنازع اور تیل کی ترسیل کے راستوں کو لاحق خطرات کے باعث بیرونِ ملک خام تیل کے ذخائر بڑھانے کی کوششیں تیز کردی ہیں۔
رپورٹ کے مطابق سعودی عرب اور متحدہ عرب امارات نے جاپان سے اپنے تیل کے ذخائر میں نمایاں اضافے کے لیے بات چیت کی ہے۔ دونوں ممالک اس وقت جاپانی ذخیرہ گاہوں میں تقریباً 80 لاکھ بیرل، فی ملک، خام تیل رکھتے ہیں اور ان ذخائر کو 10 گنا تک بڑھانے کی تجویز زیرِ غور ہے۔
ذرائع کے مطابق سعودی عرب اور متحدہ عرب امارات کے حکام جنوبی کوریا میں بھی اپنے خام تیل کے ذخائر بڑھانے کے لیے بات چیت کررہے ہیں۔
یہ بھی پڑھیں: آبنائے ہرمز کشیدگی، سعودی آرامکو کی ایشیا کو تیل سپلائی متاثر ،خریداروں کے لیے طریقہ کار تبدیل
رپورٹ میں کہا گیا ہے کہ خلیجی ممالک خطے میں اپنے تیل کے بڑے ذخائر رکھنے کے بجائے کچھ خام تیل محفوظ مقامات پر منتقل کرنا چاہتے ہیں تاکہ جنگ یا سمندری راستوں میں رکاوٹ کی صورت میں سپلائی کو محفوظ رکھا جاسکے۔
بحیرہ احمر میں حوثی حملوں اور آبنائے ہرمز کی صورتحال کے باعث خلیج سے تیل کی ترسیل کے راستوں کو خطرات لاحق ہیں۔
سعودی عرب اور متحدہ عرب امارات کے پاس ایسی زمینی پائپ لائنیں بھی موجود ہیں جو آبنائے ہرمز کو بائی پاس کرتی ہیں، تاہم ان کے ذریعے محدود مقدار میں تیل برآمد کیا جاسکتا ہے۔
