کوٹ ادو ( پاک ترک نیوز) مظفرگڑھ کینال میں لوڈر رکشہ گرنے کے افسوسناک حادثے میں 6 افراد جاں بحق ہوگئے، جبکہ 11 افراد کو ریسکیو کرلیا گیا۔ حادثے کے بعد 9 افراد تاحال لاپتہ ہیں، جن کی تلاش کے لیے ریسکیو آپریشن جاری ہے۔
ڈی پی او کے مطابق لوڈر رکشے میں بچوں اور خواتین سمیت 26 افراد سوار تھے۔ تمام افراد ایک ہی خاندان سے تعلق رکھتے تھے اور شادی کی تقریب میں شرکت کے لیے جا رہے تھے۔
ابتدائی اطلاعات کے مطابق رکشہ گنجائش سے زیادہ افراد سوار ہونے کے باعث اوورلوڈ تھا۔ دورانِ سفر رکشہ بے قابو ہوکر مظفرگڑھ کینال میں جاگرا، جس کے بعد موقع پر کہرام مچ گیا۔
حادثے کی اطلاع ملتے ہی ریسکیو ٹیمیں فوری طور پر موقع پر پہنچیں اور امدادی کارروائیاں شروع کردیں۔ ریسکیو اہلکاروں نے نہر سے 11 افراد کو بحفاظت نکال لیا، تاہم 6 افراد کی ہلاکت کی تصدیق ہوئی۔
ریسکیو حکام کے مطابق نہر میں بہہ جانے والے 9 افراد کی تلاش جاری ہے۔ لاپتہ افراد کی تلاش کے لیے غوطہ خوروں سمیت ریسکیو ٹیمیں سرچ آپریشن میں مصروف ہیں۔
یہ بھی پڑھیں: گڈز ٹرانسپورٹرز کی چوتھے روز ملک گیر ہڑتال، آج حکومت سے مذاکرات ہونگے
پولیس اور ضلعی انتظامیہ کے اہلکار بھی جائے حادثہ پر موجود ہیں اور امدادی کارروائیوں کی نگرانی کر رہے ہیں۔ حکام کے مطابق لاپتہ افراد کی تلاش مکمل ہونے تک آپریشن جاری رہے گا۔
حادثے کے باعث متاثرہ خاندان کے گھروں میں صفِ ماتم بچھ گئی ہے، جبکہ ایک ہی خاندان کے متعدد افراد کے حادثے کا شکار ہونے پر علاقے میں بھی سوگ کی فضا ہے۔
