اسلام آباد ( پاک ترک نیوز) محکمہ موسمیات نے اسلام آباد سمیت ملک کے مختلف شہروں میں آج تیز ہواؤں اور گرج چمک کے ساتھ بارش کی پیشگوئی کی ہے۔
محکمہ موسمیات کا کہنا ہے کہ اسلام آباد ، راولپنڈی ، لاہور،سیالکوٹ ، نارووال، مری ، گلیات ، بٹگرام، ایبٹ آباد، مانسہرہ، کرم، ہری پور سانگھڑ، تھر پارکر، عمر کو ٹ، سبی، بدین اور ٹھٹھہ میں بارش متوقع ہے۔
گلگت بلتستان اور آزاد کشمیر میں بھی چند مقا مات پر گرج چمک کے ساتھ بارش ہو سکتی ہے۔بلوچستان کے بیشتر اضلاع میں موسم گرم اورخشک رہنے کا امکان ظاہر کیا گیا ہے تاہم ژوب ، موسیٰ خیل ، بار کھان ، لسبیلہ اور خضدار بادل برسنے کا امکان ہے۔
پی ڈی ایم اے نے بتایا کہ شدید بارش کے باعث خصوصاً گلیات، مانسہرہ ، کوہستان، چترال، دیر، سوات، شانگلہ، خیبر، کوہاٹ ، صوابی، وزیرستان اور ٹانک میں ندی نالوں اور دریاؤں میں طغیانی کا خدشہ ہے۔
پشاور، نوشہرہ، ٹانک اور ڈیرہ اسماعیل خان کے نشیبی علاقوں میں اربن فلڈنگ جبکہ ایبٹ آباد ، مالاکنڈ ، سوات ، بونیر ، تورغر اور دیگر مقامات پر لینڈ سلائیڈنگ کا خدشہ ہے۔












