مکہ مکرمہ ( پاک ترک نیوز) حج کے مقدس مناسک کی ادائیگی کے لیے دنیا بھر سے آئے لاکھوں عازمین میں ایک ایسا چہرہ بھی سامنے آیا ہے جس کی روحانی کہانی ایمان و ہدایت کی روشن مثال بن گئی ہے۔
یہ کہانی اٹلی سے تعلق رکھنے والے نومسلم محمد لوقا کی ہے، جنہوں نے اذان کی پہلی پکار سن کر اسلام کی طرف رجوع کیا۔
محمد لوقا اس وقت منیٰ میں دیگر حجاج کے ساتھ مناسکِ حج ادا کر رہے ہیں۔ ان کے مطابق انہوں نے پہلی بار اذان کی آواز 12 سال کی عمر میں ٹی وی پر سنی تھی، جس نے ان کے دل پر گہرا اثر چھوڑا اور یہی آواز ان کے لیے ہدایت کا ذریعہ بن گئی۔
انہوں نے بتایا کہ اذان کی اس روح پرور صدا نے انہیں اسلام کے مطالعے پر مجبور کیا۔ سالوں تک تحقیق، تقابلی مطالعے اور غور و فکر کے بعد انہوں نے اسلام قبول کر لیا اور اپنی زندگی کو ایک نئے مقصد سے جوڑ لیا۔
محمد لوقا کا کہنا ہے کہ اسلام نے انہیں زندگی کا واضح راستہ، ذہنی سکون اور مضبوط شناخت عطا کی۔ ان کے مطابق ماضی کی الجھنیں اور بے یقینی ختم ہو گئی ہے اور اب وہ اللہ تعالیٰ کا شکر ادا کرتے ہیں کہ انہیں دینِ حق کی طرف رہنمائی ملی۔
سعودی عرب میں حج کے دوران حجاج کے شاندار انتظامات اور حرمین شریفین کے بہترین نظم و نسق کو بھی انہوں نے سراہا۔ ان کا کہنا ہے کہ حرمین میں گونجنے والی اذانیں اور لبیک کی صدائیں ان کے ایمان کو مزید مضبوط کر رہی ہیں۔
