دمبولا : (پاک ترک نیوز)پاکستان اور سری لنکا کے درمیان دوسرا ٹی 20 انٹرنیشنل آج دمبولا میں کھیلا جائے گا۔
پاکستان نے سری لنکا کو اس کے ملک میں کھیلے گئے پہلے ٹی ٹونٹی میں 8 وکٹ سے مات دے کر 3 ٹی ٹونٹی میچز کی سیریز میں برتری حاصل کرلی ہے۔ اب پاکستانی ٹیم کینظریں سیریز جیتنے پر مرکوز ہیں۔
دوسرا میچ آج دمبولا میں کھیلا جائے گا۔ اس میچ میں اسپنرزکی کارکردگی ایک بار پھر توجہ کا مرکز ہوگی۔ ٹاپ آرڈر بیٹرز سے بھی اچھی کارکردگی کی توقع ہے۔ بدھ کوکھیلے جانے والے میچ میں اسپنرز نے 5 وکٹیں حاصل کی تھیں۔ ان میں سے 25 رنز کے عوض شاداب خان نے دو حاصل کیں۔ ابرار احمد نے اس سے بھی بہتر کارکردگی کا مظاہرہ کرتے ہوئے 25 رنز دے کر 3 کھلاڑیوں کو آئوٹ کیا تھا۔
کہا جاتا ہے سری لنکاکی ٹیم اسپنرز کیخلاف اچھا نہیں کھیلتی۔ پاکستان نےاس کو دیکھتے ہوئے سری لنکا کیخلاف اپنا ہوم ورک پہلے ہی کر رکھا ہے۔
پاکستانی ٹیم کے ہیڈ کوچ مائیک ہیسن بھی کھلاڑیوں کی پہلے میچ میں کارکردگی سے کافی خوش ہیں۔ اگرچہ انہوں نے ناقص فیلڈنگ پر تشویش ظاہر کی تھی، لیکن ساتھ ہی یہ بھی کہاکہ نوجوان کھلاڑیوں نے بہت ہی زبردست پرفارم کیا، جس انداز میں ہم نے گیند کے ساتھ آغاز کیا اس پر مجھے بہت زیادہ خوشی ہے۔ اسٹمپس پر اٹیک نے ہی ہمیں کھیل پر کنٹرول کا موقع فراہم کیا، جس کے بعد اسپنرز آزمائے، اگرچہ فیلڈ میں کچھ سستی دکھائی دی مگر مجموعی طور پر کارکردگی اچھی رہی۔
سری لنکا کیخلاف دوسرا ٹی 20، پاکستانی ٹیم میدان میں اترنے کو تیار
