واشنگٹن (پاک ترک نیوز )امریکی صدر ڈونلڈ ٹرمپ نے جنگ کے خاتمے سے متعلق امریکی تجویز پر ایران کا جواب مسترد کر دیا۔
صدر ڈونلڈ ٹرمپ نے ٹروتھ سوشل پر بیان جاری کرتے ہوئے کہا کہ ابھی ایران کے نام نہاد “نمائندوں” کی طرف سے دیا گیا جواب پڑھا ہے جو مجھے بالکل پسند نہیں آیا ، یہ مکمل طور پر ناقابلِ قبول ہے۔
امریکی اخبار وال اسٹریٹ جرنل کا دعویٰ ہے کہ جنگ کے خاتمے کی امریکی تجویز پر ایران کا جواب پاکستان کے ذریعے امریکا کو موصول ہوگیا۔
امریکی اخبار کے مطابق ایران نے جنگ کے خاتمے سے متعلق امریکی تجویز کا تفصیلی جواب بھجوا دیا ہے۔امریکی اخبار کا دعویٰ ہے کہ ایران نے یورینیم افزودگی عارضی طور پر روکنے پر آمادگی ظاہر کر دی،البتہ ایران نے امریکا کا 20 سال تک یورینیم افزدوہ نہ کرنے کا مطالبہ مسترد کر دیا۔
امریکی اخبار کے مطابق ایران نے جنگ بندی اور آبنائے ہرمز مرحلہ وار کھولنے کی تجویز دی ہے اور امریکی پابندیاں اور بحری ناکہ بندی ختم کرنے کا مطالبہ کیا ہے۔
امریکی اخبار کا کہنا ہے کہ ایران نے جوہری معاملات پر آئندہ 30 روز میں مذاکرات کی تجویز دی ہے جبکہ ایران نے جوہری تنصیبات ختم کرنے کا امریکی مطالبہ بھی مسترد کر دیا ہے۔
