پاک فوج کی تیاری نئے مرحلے میں داخل، ہر ممکن خطرے سے نمٹنے کو تیار ہیں: فیلڈ مارشل

راولپنڈی:(پاک ترک نیوز)چیف آف آرمی اسٹاف اور چیف آف ڈیفنس فورس، فیلڈ مارشل سید عاصم منیر نے واضح کیا ہے کہ پاکستان کی مسلح افواج ہمہ وقت کسی بھی نوعیت کے خطرے کا مقابلہ کرنے کے لیے تیار ہیں اور دفاعی صلاحیتوں کو جدید تقاضوں سے ہم آہنگ کیا جا رہا ہے۔
پاک فوج کے شعبہ تعلقات عامہ کے مطابق فیلڈ مارشل عاصم منیر نے بہاولپور کے قریب خیرپور ٹامیوالی میں منعقدہ بڑی جنگی مشق اسٹیڈ فاسٹ ریزولوو کا مشاہدہ کیا، جہاں جدید جنگی حکمتِ عملی، ڈرون ٹیکنالوجی، الیکٹرانک وارفیئر، جدید نگرانی کے نظام اور کمانڈ اینڈ کنٹرول سسٹمز کا عملی مظاہرہ پیش کیا گیا۔
مشقوں کے دوران فیلڈ مارشل نے افسران اور جوانوں کے غیر متزلزل حوصلے، پیشہ ورانہ مہارت اور آپریشنل تیاری کو سراہا۔ جوانوں سے خطاب میں انہوں نے کہا کہ ملکی خودمختاری اور علاقائی سالمیت کے تحفظ کے لیے مسلح افواج ہر سطح پر مکمل طور پر تیار ہیں۔
فیلڈ مارشل عاصم منیر نے اس موقع پر کہا کہ موجودہ دور میں جنگ کی نوعیت تیزی سے تبدیل ہو چکی ہے اور مستقبل کے معرکوں میں ٹیکنالوجی فیصلہ کن کردار ادا کرے گی۔
ان کے مطابق روایتی جنگی طریقوں کے ساتھ ساتھ ذہنی اور فکری تبدیلی بھی ناگزیر ہو چکی ہے۔انہوں نے زور دیا کہ مسلح افواج جدید ٹیکنالوجی کو تیزی سے اپنا رہی ہیں، جہاں جدت اور مقامی سطح پر صلاحیتوں کی تیاری دفاعی حکمتِ عملی کے بنیادی ستون ہوں گے۔
بعد ازاں فیلڈ مارشل عاصم منیر نے روہی ای اسکلز لرننگ ہب کا افتتاح کیا، جو جنوبی پنجاب سمیت ملک بھر کے نوجوانوں کو ڈیجیٹل مہارتوں سے آراستہ کرنے کے لیے قائم کیا گیا ہے۔
انہوں نے کہا کہ جدید دور میں قومی ترقی کے لیے تعلیم اور ہنر ناگزیر ہیں۔اس موقع پر انہوں نے آرمی پبلک اسکول عباسیہ کیمپس کا بھی افتتاح کیا اور اس عزم کا اعادہ کیا کہ معیاری تعلیم اور کردار سازی کے فروغ میں پاک فوج کا کردار جاری رہے گا۔
فیلڈ مارشل نے ای ایم ای ریجنل ورکشاپ کا دورہ بھی کیا، جہاں انہیں جدید دفاعی پلیٹ فارمز کی دیکھ بھال، مقامی تیاری اور نئی ٹیکنالوجی سے متعلق تفصیلی بریفنگ دی گئی۔
بہاولپور گیریژن آمد پر کور کمانڈر نے ان کا استقبال کیا۔ فیلڈ مارشل عاصم منیر نے یادگارِ شہداء پر حاضری دی، پھول رکھے اور شہداء کی قربانیوں کو خراجِ عقیدت پیش کیا۔