تہران (پاک ترک نیوز )ایرانی صدر مسعود پزشکیان نے کہا ہے کہ ایران سعودی عرب کے ساتھ حالتِ جنگ میں نہیں، جبکہ حوثیوں کے اپنے مسائل ہیں، ایران کا ان سے براہِ راست کوئی جنگی تعلق نہیں۔
ایک بیان میں ایرانی صدر مسعود پزشکیان نے کہا کہ خطے کے تمام ممالک کو ایک میز پر بیٹھ کر باہمی اختلافات کا حل تلاش کرنا چاہیے تاکہ خطے میں امن و سلامتی قائم ہو سکے۔
آبنائے ہرمز سے متعلق کل مسقط میں ایران اور عمان کے درمیان متوقع معاہدے کے حوالے سے مسعود پزشکیان کا کہنا تھا کہ اجلاس میں ان تمام ممالک کے نمائندے شریک ہوں گے جن کی سرزمین سے ایران پر حملہ کیا گیا تھا۔
ایرانی صدر نے واضح کیا کہ ایران اپنے بین الاقوامی حقوق کا حصول چاہتا ہے، جنگ نہیں۔ ایران اب بھی امن کو ترجیح دیتا ہے اور خطے میں کشیدگی کم کرنے کے لیے مذاکرات کا راستہ اختیار کرنے پر یقین رکھتا ہے۔
مسعود پزشکیان نے امریکا، اسرائیل اور یورپی ممالک پر الزام عائد کیا کہ وہ چاہتے ہیں کہ خطے کا کوئی بھی ملک آزاد اور خودمختار نہ رہے۔
ایرانی صدر نے زور دیا کہ خطے کے ممالک کو بیرونی طاقتوں پر انحصار کرنے کے بجائے باہمی مذاکرات کے ذریعے اپنے مسائل حل کرنے چاہئیں تاکہ خطے میں مستقل امن اور استحکام قائم کیا جا سکے۔
