رواں سال کے لیے زکوٰۃ کا نصاب جاری: بینک اکاؤنٹس میں کتنی رقم پر کٹوتی ہوگی؟

اسلام آباد: (پاک ترک نیوز)وزارت تخفیفِ غربت و سماجی تحفظ نے 2026 ء کے لیے زکوٰۃ کا نصاب باضابطہ طور پر اعلان کر دیا ہے۔
ایڈمنسٹریٹر جنرل زکوٰۃ کے مطابق اس سال نصاب 5 لاکھ 3 ہزار 529 روپے مقرر کیا گیا ہے۔ اعلامیے میں واضح کیا گیا ہے کہ یکم رمضان کو اگر کسی بینک اکاؤنٹ میں موجود رقم نصاب سے کم ہو تو اس پر زکوٰۃ نہیں کاٹی جائے گی۔
تاہم وہ تمام اکاؤنٹس جن میں رقم نصاب یا اس سے زیادہ ہوگی، ان سے زکوٰۃ کی کٹوتی عمل میں لائی جائے گی۔
زکوٰۃ کی رقم تمام سیونگ اکاؤنٹس اور نفع و نقصان میں شراکت دار اکاؤنٹس سے یکم رمضان کو کٹ کر اسٹیٹ بینک کے سینٹرل زکوٰۃ اکاؤنٹ میں جمع کرائی جائے گی۔
مزید یہ کہ یکم رمضان کو تمام مالیاتی ادارے عوامی لین دین کے لیے بند رہیں گے تاکہ زکوٰۃ کی کٹوتی بلا تعطل مکمل کی جا سکے۔
یہ قدم غریب اور محتاج طبقے کی فلاح و بہبود کے لیے مالی معاونت فراہم کرنے کے مقصد سے اٹھایا گیا ہے، اور ہر مالیاتی ادارے کے لیے زکوٰۃ کی شفاف کٹوتی یقینی بنائی گئی ہے۔