اسلام آباد (پاک ترک نیوز )حکومت نے آر ایل این جی کی عدم دستیابی کے باعث رات کے اوقات میں عارضی لوڈشیڈنگ پر صارفین سے معذرت کرلی۔
پاور ڈویژن کے ترجمان کے مطابق آر ایل این جی کا ایک کارگو بروقت نہ پہنچنے کے باعث بجلی کی پیداوار میں 3 ہزار 600 میگاواٹ کی کمی ہوئی، جس کے نتیجے میں گزشتہ رات پیک آورز کے دوران ڈیڑھ سے 3 گھنٹے تک عارضی لوڈ مینجمنٹ کی گئی۔
ترجمان کے مطابق منگلا ڈیم سے بجلی کی پیداوار میں بھی 195 میگاواٹ کمی نے صورتحال کو مزید مشکل بنا دیا۔
بجلی کی طلب پوری کرنے کے لیے پیک آورز میں فرنس آئل سے چلنے والے پاور پلانٹس بھی فعال کیے گئے۔
پاور ڈویژن کا کہنا ہے کہ آر ایل این جی کے کارگو پہنچتے ہی عارضی لوڈ مینجمنٹ میں کمی کردی جائے گی۔
ترجمان نے صارفین سے اپیل کی کہ رات کے پیک آورز میں بجلی کے استعمال میں اعتدال رکھا جائے تاکہ لوڈ مینجمنٹ کو کم سے کم سطح پر رکھا جاسکے۔
پاور ڈویژن کے مطابق دن کے اوقات میں لوڈ مینجمنٹ نہیں کی جارہی، تاہم لائن لاسز والے علاقوں میں شیڈول کے مطابق بجلی فراہم کی جارہی ہے۔
حکومت نے آر ایل این جی کی عدم دستیابی کے باعث رات کے اوقات میں عارضی لوڈ مینجمنٹ پر صارفین سے دوبارہ معذرت بھی کی ہے۔
