خیبرپختونخوا(پاک ترک نیوز) کے عوام نے مساجد کو دہشت گردی اور تخریبی سرگرمیوں کے لیے استعمال کرنے والے عناصر کی سخت الفاظ میں مذمت کرتے ہوئے واضح کیا ہے کہ ایسے اقدامات کا اسلام کی تعلیمات سے کوئی تعلق نہیں۔
سوات، تیمرگرہ، کرک، بنوں اور چترال کے شہریوں کا کہنا ہے کہ سوات اور وزیرستان میں مساجد کو دہشت گردی اور دھماکہ خیز مواد کی تیاری کے لیے استعمال کرنا انتہائی قابلِ مذمت عمل ہے۔
عوام کے مطابق مساجد عبادت اور امن کے مراکز ہیں، انہیں دہشت گردی کے لیے استعمال کرنے والے عناصر دینِ اسلام کی تعلیمات کی صریح خلاف ورزی کررہے ہیں۔
شہریوں کا کہنا ہے کہ دہشت گرد عناصر مساجد کو پناہ گاہ اور ڈھال بنا کر اپنے مذموم عزائم کو مذہبی رنگ دینے کی کوشش کرتے ہیں، ایسے عناصر کی حوصلہ شکنی ضروری ہے۔
یہ بھی پڑھیں: سموگ کے باعث اسکول بند نہیں ہوں گے، وزیر تعلیم پنجاب کا اعلان
عوام نے پاکستان مخالف بیرونی قوتوں کی مبینہ سرپرستی میں ہونے والی دہشت گردی کی سازشوں کو بے نقاب کرنے اور قومی سلامتی کے تحفظ کے لیے مؤثر اقدامات پر بھی زور دیا۔
شہریوں نے اپیل کی کہ عوام اپنے اردگرد مشکوک افراد، سرگرمیوں اور سامان پر نظر رکھیں اور کسی بھی مشکوک صورتحال کی فوری اطلاع متعلقہ ریاستی اداروں کو دیں۔
