دارفور(پاک ترک نیوز ) سوڈان کے علاقے دارفور کے شہر الفاشر میں ایک مسجد پر ڈرون حملے میں 70 سے زائد شہری جاں بحق ہوگئے۔
حکام اور فوج کے مطابق حملہ پیراملٹری گروپ ریپڈ سپورٹ فورسزنے کیا، جاں بحق افراد میں کئی بے گھر شہری بھی شامل ہیں۔
سوڈانی فوج کی چھٹی انفنٹری ڈویژن نے بیان میں کہا کہ ملیشیا نے صفیہ مسجد میں نمازِ کے دوران نمازیوں کو نشانہ بنایا جس کے نتیجے میں 75 سے زائد شہری شہید ہوئے۔
الفاشر شمالی دارفور کا دارالحکومت اور خطے میں فوج کا آخری بڑا گڑھ ہے، جہاں آر ایس ایف مئی 2024 سے محاصرہ کئے ہوئے ہے، فوجی تنصیبات کو نشانہ بنانے کی کوششوں میں ہسپتال، سکول اور بے گھر افراد کے مراکز بھی متاثر ہوئے ہیں۔
مقامی رضا کاروں کے مطابق نمازیوں کی لاشیں مسجد کے ملبے سے نکالی گئیں، سوشل میڈیا پر مقامی مزاحمتی کمیٹیوں نے ویڈیوز جاری کی ہیں جن میں مسجد کے حصے ملبے کا ڈھیر اور جاں بحق افراد کی لاشیں دکھائی گئی ہیں۔
سوڈان ڈاکٹرز نیٹ ورک نے واقعہ کو غیر مسلح شہریوں کے خلاف سنگین جرم قرار دیتے ہوئے کہا کہ آر ایس ایف کی یہ کارروائی انسانی اور مذہبی اقدار و عالمی قوانین کی کھلی خلاف ورزی ہے۔
اقوام متحدہ نے خبردار کیا کہ سوڈان کی خانہ جنگی میں نسلی تشدد بڑھ رہا ہے اور عام شہری سب سے زیادہ متاثر ہو رہے ہیں۔
سوڈان میں مسجد پر ڈرون حملہ، 70 سے زائد شہری جاں بحق
