اسلام آباد (پاک ترک نیوز )وزیراعظم شہباز شریف نے کہا ہے کہ حکومت نے میرٹ پر 7 لاکھ قابل نوجوانوں کو لیپ ٹاپ فراہم کیے ہیں، جبکہ نوجوانوں کے لیے پہلی ایمپلائمنٹ پالیسی متعارف کرانے اور ہر سال اسٹارٹ اپس کے لیے 10 فیصد کوٹہ مختص کرنے کا اعلان بھی کیا ہے۔
وزیراعظم نے نوجوانوں کے عالمی دن کے موقع پر خطاب کرتے ہوئے کہا کہ ماضی میں لیپ ٹاپ تقسیم کرنے پر نوجوانوں کو رشوت دینے کا طعنہ دیا جاتا تھا، لیکن حکومت کے لیے لیپ ٹاپ صرف ایک مشین نہیں بلکہ ایک مشن ہے۔
انہوں نے کہا کہ اگر نوجوانوں کو جدید تعلیم کے سفر میں شامل نہ کیا گیا تو ملک پیچھے رہ جائے گا، جبکہ نوجوانوں کو تعلیم کے یکساں مواقع فراہم کیے بغیر ترقی ممکن نہیں۔
شہباز شریف نے دانش اسکولوں کا دائرہ دیگر صوبوں تک بڑھانے اور اگلے سال اسلام آباد میں دانش یونیورسٹی قائم کرنے کا بھی اعلان کیا۔
وزیراعظم نے کہا کہ بعض نوجوانوں کے پاس پیسے نہیں لیکن نمبر موجود ہیں، ایسے نوجوانوں کے لیے دانش یونیورسٹی کے دروازے کھلے ہوں گے۔
