ںیویارک (پاک ترک نیوز )نائب وزیراعظم اور وزیر خارجہ اسحاق ڈار نے نیویارک میں الجزائر کے وزیر خارجہ احمد عطاف سے ملاقات کی، جس میں پاکستان اور الجزائر کے دوطرفہ تعلقات سمیت باہمی دلچسپی کے مختلف امور پر تفصیلی تبادلہ خیال کیا گیا۔
ملاقات میں دونوں ممالک کے درمیان تجارت، سرمایہ کاری، معاشی تعاون، تعلیم، ثقافت اور عوامی روابط مزید مضبوط بنانے کے عزم کا اعادہ کیا گیا۔
اسحاق ڈار اور احمد عطاف نے دونوں ممالک کے درمیان اعلیٰ سطحی روابط برقرار رکھنے کی اہمیت پر بھی زور دیا۔
ملاقات کے دوران علاقائی اور عالمی امور پر بھی تبادلہ خیال ہوا۔ اسحاق ڈار نے عصری چیلنجز سے نمٹنے کے لیے مکالمے اور سفارت کاری کی اہمیت پر زور دیا۔
دونوں رہنماؤں نے اقوام متحدہ سمیت مختلف کثیر الجہتی فورمز پر پاکستان اور الجزائر کے درمیان بہترین تعاون پر اطمینان کا اظہار کیا اور کثیر الجہتی سطح پر تعاون مزید مضبوط بنانے پر اتفاق کیا۔
ملاقات کے اختتام پر دونوں ممالک نے قریبی رابطہ برقرار رکھنے اور دوطرفہ تعلقات میں تعاون کی رفتار کو مزید آگے بڑھانے کے عزم کا اعادہ کیا۔
