گوجرانوالہ(پاک ترک نیوز ) وفاقی وزیر داخلہ محسن نقوی نے گوجرانوالہ کے ریجنل پاسپورٹ آفس کا اچانک دورہ کیا تو دفتر مقررہ وقت سے قبل ہی بند ملا، جس پر وزیر داخلہ نے شدید برہمی کا اظہار کرتے ہوئے تمام عملے کو فوری طور پر عہدوں سے ہٹانے کا حکم دے دیا۔
ذرائع کے مطابق سہ پہر 4 بجے ہی پاسپورٹ آفس میں صفائیاں شروع کردی گئی تھیں اور دفتر میں چھٹی کا سماں تھا، جبکہ شہریوں کو اندر داخل ہونے کے بجائے باہر سے ہی واپس بھجوایا جا رہا تھا۔
محسن نقوی نے دفتر کی صورتحال کا جائزہ لیا تو وہاں موجود واحد اسٹاف بھی وزیر داخلہ کے کسی سوال کا جواب نہ دے سکا۔
وزیر داخلہ نے استفسار کیا کہ اگر دفتر کے بند ہونے کا مقررہ وقت ساڑھے چار بجے ہے تو 4 بجے ہی دفتر کو تالے کیوں لگا دیے گئے؟
محسن نقوی نے برہمی کا اظہار کرتے ہوئے کہا کہ دفتر بند کرکے صفائیاں کی جا رہی ہیں اور عملہ بھی موجود نہیں، یہ سب کیا ہو رہا ہے؟ کیا عوام کی سہولت کے لیے قائم دفاتر ایسے چلتے ہیں؟
یہ بھی پڑھیں:وزیر داخلہ محسن نقوی کا سیف سٹی ہیڈ کوارٹرز کا دورہ
وزیر داخلہ نے کہا کہ شہری دفتر سے باہر آ رہے ہیں اور انہیں وہیں سے واپس بھجوایا جا رہا ہے، شہری خدمات کی فراہمی میں کسی قسم کی کوتاہی برداشت نہیں کی جائے گی۔
محسن نقوی نے تمام عملے کو فوری طور پر عہدوں سے ہٹانے کا حکم دیتے ہوئے کہا کہ عوامی خدمات پر مامور سٹاف کی جانب سے سرکاری فرائض میں غفلت پر تادیبی کارروائی کی جائے گی۔
وفاقی وزیر داخلہ نے واضح کیا کہ شہریوں کو بروقت اور بہتر سہولیات کی فراہمی ریاستی اداروں کی بنیادی ذمہ داری ہے اور اس معاملے میں غفلت کسی صورت برداشت نہیں کی جائے گی۔
