راولپنڈی(پاک ترک نیوز ) کویت کے وزیر دفاع شیخ عبداللہ علی عبداللہ السالم الصباح کی سربراہی میں اعلیٰ سطح کے وفد نے جی ایچ کیو راولپنڈی کا دورہ کیا، جہاں کویتی وزیر دفاع اور چیف آف جنرل اسٹاف لیفٹیننٹ جنرل خالد دارج سعد الشریعان نے فیلڈ مارشل سید عاصم منیر سے ملاقات کی۔
آئی ایس پی آر کے مطابق ملاقات میں باہمی دلچسپی کے امور، علاقائی سلامتی کی صورتحال اور پاکستان اور کویت کے درمیان دوطرفہ دفاعی تعاون پر تبادلہ خیال کیا گیا۔
دونوں جانب سے ادارہ جاتی روابط مزید مضبوط بنانے اور باہمی مفاد پر مبنی دفاعی تعاون کو وسعت دینے کے عزم کا اعادہ کیا گیا۔
کویتی وفد نے علاقائی امن و استحکام کے لیے پاک فوج کی پیشہ ورانہ صلاحیتوں اور خدمات کو سراہا۔
یہ بھی پڑھیں :ٹرمپ کا دورہ ایران سے پہلے فیلڈ مارشل کو فون
ملاقات میں پاکستان اور کویت کے درمیان تاریخی برادرانہ تعلقات کو مزید مضبوط اور دیرپا دفاعی شراکت داری میں تبدیل کرنے کے عزم کا بھی اظہار کیا گیا۔
آئی ایس پی آر کے مطابق پاک کویت قیادت کی یہ ملاقات دونوں ممالک کے تاریخی برادرانہ تعلقات کو مضبوط اور پائیدار دفاعی شراکت داری میں ڈھالنے کے عزم کی عکاس ہے۔
دونوں ممالک کے درمیان بڑھتا ہوا دفاعی تعاون علاقائی امن، سلامتی اور استحکام کے فروغ میں بھی اہم کردار ادا کرے گا۔
