حکومت کا ساڑھے 7 لاکھ ٹن گندم درآمد کرنے کا فیصلہ

اسلام آباد(پاک ترک نیوز ) حکومت نے ملک میں گندم کی ضروریات پوری کرنے کے لیے 7 لاکھ 50 ہزار میٹرک ٹن گندم درآمد کرنے کا فیصلہ کرلیا۔
ذرائع کے مطابق ڈپٹی وزیراعظم اسحاق ڈار کی زیرصدارت کمیٹی نے ساڑھے 7 لاکھ ٹن گندم درآمد کرنے کی منظوری دی، جس کے بعد ٹریڈنگ کارپوریشن آف پاکستان نے گندم کی درآمد کے لیے بین الاقوامی ٹینڈر جاری کردیا ہے۔
ذرائع کا کہنا ہے کہ گندم کراچی اور گوادر کی بندرگاہوں پر قیمت، مال برداری اور انشورنس سمیت درآمد کی جائے گی، جبکہ درآمد کی جانے والی گندم تازہ ترین فصل سے حاصل کی جائے گی۔
ٹینڈر کے تحت 50 ہزار میٹرک ٹن سے کم گندم کی پیشکش قبول نہیں کی جائے گی۔
ذرائع کے مطابق درآمد کی جانے والی گندم صوبوں کی ضروریات کے مطابق تقسیم کی جائے گی۔ سندھ کو 3 لاکھ، پنجاب کو 2 لاکھ 50 ہزار جبکہ خیبرپختونخوا کو 2 لاکھ میٹرک ٹن گندم فراہم کی جائے گی۔
وزیراعظم شہباز شریف نے اس سے قبل صوبوں کی درخواست پر 10 لاکھ ٹن گندم درآمد کرنے کی اصولی منظوری دی تھی، تاہم بعد ازاں 7 لاکھ 50 ہزار ٹن گندم درآمد کرنے کا فیصلہ کیا گیا۔
ذرائع کے مطابق پاکستان میں گندم کی سالانہ کھپت تقریباً 3 کروڑ 13 لاکھ ٹن ہے، جبکہ اقتصادی جائزہ 2025-26 کے مطابق ملک میں گندم کی پیداوار 2 کروڑ 96 لاکھ 10 ہزار ٹن رہی۔
اس طرح ملکی پیداوار اور سالانہ ضرورت کے درمیان نمایاں فرق موجود ہے، جسے پورا کرنے کے لیے گندم درآمد کرنے کا فیصلہ کیا گیا ہے۔
ذرائع کے مطابق جولائی کے پہلے ہفتے تک پاسکو کے پاس 17 لاکھ 83 ہزار ٹن گندم کا ذخیرہ موجود تھا۔