اسلام آباد (پاک ترک نیوز )وزیراعظم شہباز شریف کے مشیر برائے سیاسی امور رانا ثناء اللہ نے کہا ہے کہ جمعیت علمائے اسلام کے سربراہ مولانا فضل الرحمٰن مشکل وقت میں مسلم لیگ ن کے ساتھ کھڑے ہوئے ہیں، ان کے ساتھ سیاسی اختلافات اور حالیہ تلخ کلامی ختم کرنے کی کوشش کی جائے گی۔
رانا ثناء اللہ کا کہنا تھا کہ سیاسی جماعتوں کے درمیان اس طرح کی صورتحال پیدا ہوجاتی ہے، اس میں پریشانی کی کوئی بات نہیں۔ مسلم لیگ ن کی کوشش ہوگی کہ باہمی تلخ کلامی کو روکا جائے اور معاملات کو افہام و تفہیم سے حل کیا جائے۔
انہوں نے کہا کہ مولانا فضل الرحمٰن ایک منجھے ہوئے اور سینئر سیاستدان ہیں۔ پاکستان ڈیموکریٹک موومنٹ کے دور میں مولانا فضل الرحمٰن کے ساتھ مسلم لیگ ن کی اچھی یادیں وابستہ ہیں اور ان کے ساتھ سیاسی تعلقات کی ایک طویل تاریخ ہے۔
رانا ثناء اللہ نے اعتراف کیا کہ مولانا فضل الرحمٰن کی جانب سے ریاست اور شہداء کے حوالے سے بعض سخت باتیں کی گئیں، جس کے جواب میں مسلم لیگ ن کی طرف سے بھی ردعمل دیا گیا۔ تاہم اب بھی کوشش یہی ہوگی کہ مولانا فضل الرحمٰن کے ساتھ بیٹھ کر ان معاملات کو ختم کیا جائے۔
یہ بھی پڑھیں: سنگاپور کے وزیر خارجہ ڈاکٹر ویویئن بالاکرشنن دو روزہ دورے پر اسلام آباد پہنچ گئے
اٹھائیسویں آئینی ترمیم سے متعلق سوال پر رانا ثناء اللہ نے کہا کہ اس کا مسودہ تاحال حتمی شکل اختیار نہیں کرسکا۔ جب یہ ترمیم پارلیمنٹ میں پیش کی جائے گی تو اس پر بحث ہوگی۔
