آر اے شمشاد
آئی سی سی ویمنز ٹی ٹونٹی ورلڈ کپ کا آج سے آغاز ہونے جا رہا ہے ۔ قومی ٹیم بھی ٹائٹل کے حصول کیلئے پر امید ہے ۔
افتتاحی میچ میں انگلینڈ اور سری لنکا کی ٹیمیں کل مد مقابل آئیں گی ۔ یہ میچ برمنگھم میں کھیلا جائے گا ۔روایتی حریف پاکستان اور بھارت کی ٹیمیں 14جون کو برمنگھم میں مد مقابل آئیں گی جس کا شائقین کرکٹ کو شدت سے انتظار ہے ۔ قومی ٹیم کی قیادت فاطمہ ثنا کر رہی ہیں ۔
میگا ایونٹ کا آغاز آج 12جون سے ہو گا اور 05جولائی تک جاری رہے گا ۔ پہلا سیمی فائنل 30جون جبکہ دوسرا 02جولائی کو کھیلا جائے گا جبکہ ٹائٹل کیلئے آخری معرکہ 05جولائی کو تاریخی گرائونڈ لارڈز میں کھیلا جائے گا ۔ نیوزی لینڈ ویمنز ٹیم دفاعی چیمئپن کے طور پر میدان میں اترے گی ۔
آئی سی سی ویمنز ورلڈ کپ میں 30گروپ میچز کھیل جائیں گے جبکہ سیمی فائنل اور فائنل ملاکر شائقین کو 33میچز دیکھنے کو ملیں گے ۔
ورلڈ کپ میں 12ٹیموں کو دو گروپوں میں رکھا گیا ہے ۔ گروپ ایک میں پاکستان کے ساتھ آسٹریلیا ،بنگلہ دیش ،بھارت ،نیدر لینڈز اور سائوتھ افریقہ کی ٹیمیں شامل ہیں ۔
گروپ 2میں انگلینڈ ،آئرلینڈ ،نیوزی لینڈ ،سکاٹ لینڈ ،سری لنکا کے ساتھ ویسٹ انڈیز کی ٹیم بھی شامل ہے ۔
پاکستانی ویمنز ٹیم اپنا پہلا روایتی حریف بھارت کو 14جون ،جنوبی افریقہ کیخلاف 17جون ،بنگلہ دیش کے ساتھ 20،آسریلیا کے ساتھ 23جبکہ اپنا آخری گروپ میچ نیدر لینڈز کیخلاف 27جون کو کھیلے گی ۔
پاکستانی ویمنز ٹیم نے ورلڈ کپ سے قبل سری لنکا اور سکاٹ لینڈ ویمنز ٹیم کے ساتھ پریکٹس کھیلا تھا تاہم پاکستانی ٹیم جیتنے میں ناکام رہی تھی ۔
ویمنز ورلڈ کپ کے اب تک 9میگا ایونٹ ہو چکے ہیں جہاں آسٹریلیا 6ٹائٹل کے ساتھ سرفہرست ہے جبکہ انگلینڈ ، ویسٹ انڈیز اور نیوزی لینڈ کی ویمنز ٹیمیں ایک ایک بار ٹرافی اپنے نام کر چکی ہیں ۔
روایتی حریف پاکستان اور بھارت سمیت کوئی ایشیائی ٹیم ابھی تک ویمنز ورلڈ کپ کا تاج اپنے نام کرنے میں ناکام رہی ہے ۔
