واشنگٹن ( پاک ترک نیوز) چین سے دو دیوہیکل پانڈا امریکا کے شہر اٹلانٹا پہنچ گئے، پانڈوں کی منتقلی چین اور امریکا کے درمیان طے پانے والے نئے معاہدے کے تحت ہوئی ہے۔غیر ملکی خبر ایجنسی کے مطابق پنگ پنگ اور فو شوانگ چین کے شہر چینگدو سے خصوصی طیارے کے ذریعے اٹلانٹا پہنچے۔ نئے معاہدے کے بعد اٹلانٹا امریکا کے ان تین چڑیا گھروں میں شامل ہوگیا ہے جہاں دیوہیکل پانڈا رکھے جائیں گے۔اٹلانٹا چڑیا گھر کے حکام کے مطابق دونوں پانڈوں کو تقریباً ایک ماہ تک قرنطینہ میں رکھا جائے گا، جس کے بعد انہیں شہریوں کے لیے پیش کیا جائے گا۔ پانڈوں کی عوامی نمائش کی حتمی تاریخ ابھی مقرر نہیں کی گئی۔
یہ بھی پڑھیں: اسپیس ایکس کا اسٹارشپ آج پہلی بار مدار میں پہنچنے کی کوشش کرے گا
دونوں پانڈا 2020 میں پیدا ہوئے اور چینگدو میں دیوہیکل پانڈا افزائش کے تحقیقی مرکز میں پرورش پاتے رہے ہیں۔معاہدے کے تحت پنگ پنگ اور فو شوانگ دس سال تک اٹلانٹا چڑیا گھر میں رہیں گے۔چین طویل عرصے سے پانڈوں کو سفارتی تعلقات میں خیرسگالی اور دوستی کی علامت کے طور پر استعمال کرتا آیا ہے۔ چینی صدر شی جن پنگ نے بھی پانڈوں کی امریکا منتقلی کو دونوں ملکوں کے عوام کے درمیان دوستی کی علامت قرار دیا ہے۔
