انقرہ ( پاک ترک نیوز) ترکیہ نے بغیر پائلٹ جنگی طیاروں کی صلاحیت میں ایک اور بڑی پیش رفت کرلی۔ بائیکر کے تیار کردہ اکینجی جنگی ڈرون نے روکیتسان کے تیار کردہ آئی ایچ اے 300 فوق صوتی بیلسٹک میزائل کے ذریعے 250 کلومیٹر سے زائد فاصلے پر موجود سمندری ہدف کو براہِ راست نشانہ بنا دیا۔ ترک کمپنی بائیکر کے مطابق یہ تجربہ 11 ستمبر کو بحیرہ اسود میں سائنوب کے ساحل کے قریب کیا گیا۔ اکینجی نے ٹیکرداغ کے شہر چورلو میں قائم پرواز، تربیت اور تجرباتی مرکز سے اڑان بھری اور مقررہ آزمائشی علاقے تک پہنچنے کے بعد آئی ایچ اے 300 میزائل داغا۔ میزائل نے 250 کلومیٹر سے زیادہ فاصلے پر موجود سمندری ہدف کو براہِ راست نشانہ بنایا۔
یہ بھی پڑھیں: مکہ مشترکہ دفاعی معاہدہ اسلامی دنیا کے لیے اہم پیغام ہے، اردوان
یہ پیش رفت اس لیے بھی اہم ہے کہ آئی ایچ اے 300 کو اکینجی کے ذریعے استعمال کیے جانے والے طویل فاصلے کے ہتھیاروں میں شامل کیا گیا ہے۔ اس سے قبل اکینجی میں آئی ایچ اے 122 اور آئی ایچ اے 230 جیسے فوق صوتی میزائل بھی شامل کیے جا چکے ہیں۔ تجزیاتی رپورٹس کے مطابق آئی ایچ اے 300 کو بعض ترک دفاعی ذرائع تقریباً 500 کلومیٹر تک ممکنہ فاصلے والا فضائی بیلسٹک میزائل قرار دے رہے ہیں، تاہم بائیکر کے سرکاری اعلان میں اس تجربے کے دوران 250 کلومیٹر سے زائد فاصلے پر ہدف کو نشانہ بنانے کی تصدیق کی گئی ہے۔
