از : سہیل شہریار
نوبل انعام 2025 کےباضابطہ طور پر اعلانات کا سلسلہ پیر 6 اکتوبر سے شروع ہو گیا ہے ۔جو ہفتہ بھر جاری رہے گا۔ فزیالوجی یا طب کے لیے پیر کے روز ہونے والے اعلا ن میںسائنس دانوں میری برنکو، فریڈ رامسڈیل اور شمعون ساکاگوچی کو مدافعتی رواداری سے متعلق ان کی دریافتوںپر نوبل انعام سے نوازا گیا۔
ہر سال کی طرح اس مرتبہ بھی6 سے 13 اکتوبر تک پھیلا ہوا مکمل شیڈول طب اس کے بعد طبیعیات، کیمسٹری، ادب، امن اور آخرمیں اگلے پیر کو اقتصادیات کے انعام کے ساتھ اختتام پذیر ہوگا۔
نوبل انعام سب سے باوقار بین الاقوامی ایوارڈز کا ایک مجموعہ ہے جو ایک سویڈش کیمیا دان، انجینئر، اور صنعت کار الفریڈ نوبل جو بارود کی دریافت کے لیے مشہور ہےکی 1895 کی وصیت سے وابستہ ہے۔پہلا نوبل انعام 1901 میں فزکس، کیمسٹری، طب، ادب اور امن کے شعبوں میںکارہائے نمایاں پر دیا گیا۔بعد ازاں1968 میں سویڈن کے مرکزی بینک نے الفریڈ نوبل کی یاد میں اقتصادی سائنس میں انعام قائم کیا۔ جس نے انعامی زمروں کو چھ تک بڑھا دیا۔
نوبل انعامات کااعلان مختلف اداروں کی طرف سے کیا جاتا ہے۔ نوبل اسمبلی کیرولنسکا انسٹی ٹیوٹ طب کے لیے،رائل سویڈش اکیڈمی آف سائنسز فزکس، کیمسٹری اور معاشیات کے لیے، سویڈش اکیڈمی ادب کے لیے، اور ناروے کی نوبل کمیٹی امن کے لیےانعام یافتگان کا انتخاب کرتے ہیں۔
ہر انعام یافتہ کو طلائی تمغہ، ایک ڈپلومہ، اور نوبل فاؤنڈیشن کے ذریعے مالی اعانت فراہم کرنے والا نقد انعام ملتا ہے۔ اس سال کے انعام کی رقم 12لاکھ امریکی ڈالر ہے۔
اس سال کے نوبل انعامات کے شیڈول کے مطابق پیر6 اکتوبرکو فزیالوجی یا طب کے بعد منگل 7 اکتوبر کوطبیعیات۔بدھ، 8 اکتوبرکوکیمسٹری۔جمعرات 9 اکتوبر کو ادب۔جمعہ 10 اکتوبرکوامن۔ اور آخر میںپیر 13 اکتوبر کو اقتصادی سائنس میں انعام کا اعلان کیاجائے گا۔
https://www.youtube.com/watch?v=c4DutOPx4tQ
ہر سال 10 دسمبر کو الفریڈ نوبل کی برسی پرباضابطہ طور پر اسٹاک ہوم اور اوسلو میں منعقد ہونے والی جڑواں تقریبات میں نوبل انعامات دیے جاتے ہیں۔سٹاک ہوم کی تقریب میں سویڈن کا شاہی خاندان شرکت کرتا ہے۔ جہاں فزکس، کیمسٹری، میڈیسن، لٹریچر اور اکنامک سائنسز میں انعام یافتہ افراد سویڈن کے بادشاہ سے اپنے تمغے اور ڈپلومے وصول کرتے ہیں۔جبکہ اوسلو میں امن کا نوبل انعام اوسلو سٹی ہال میں ناروے کی نوبل کمیٹی کے سربراہ دیتے ہیں اور ایسا الفریڈ نوبل کی خواہش کا احترام کرتے ہوئے کیا جاتا ہے۔
دنیا بھر میں براہ راست نشر ہونے والی اس تقریب کے بعد سٹاک ہوم کے سٹی ہال میں شاہی خاندان، سفارت کاروں، سائنسدانوں اورسابقہ نوبل انعام یافتہ افراد سمیت 1,000 سے زائد مہمانوں کے لیے ایک شاندار نوبل ضیافت کا اہتمام کیا جاتا ہے۔
