لاہور( پاک ترک نیوز) اپنی منفرد اور سحر انگیز آواز سے دنیا بھر میں پہچان بنانے والی معروف لوک گلوکارہ ریشماں کی آج 13ویں برسی منائی جارہی ہے، ان کے گائے ہوئے گیت آج بھی موسیقی کے شائقین میں مقبول ہیں۔
1947 میں راجستھان میں پیدا ہونے والی ریشماں کا تعلق خانہ بدوش خاندان سے تھا۔ تقسیمِ ہند کے بعد ان کا خاندان پاکستان منتقل ہوگیا۔ انہوں نے کم عمری ہی میں صوفیانہ کلام گانا شروع کردیا اور محض 12 برس کی عمر میں ریڈیو پاکستان سے اپنے فنی سفر کا آغاز کیا۔
ریڈیو پروڈیوسر سلیم گیلانی نے انہیں حضرت لعل شہباز قلندر کے مزار پر گاتے ہوئے سنا، جس کے بعد انہیں ریڈیو پر گانے کا موقع ملا۔ 1960 کی دہائی میں پاکستان ٹیلی ویژن سے بھی ان کا سفر شروع ہوا اور جلد ہی وہ لوک موسیقی کی مقبول ترین آوازوں میں شمار ہونے لگیں۔
ریشماں کے مشہور گیتوں میں ’’لمبی جدائی‘‘، ’’سن چرخے دی مٹھی مٹھی کوک‘‘، ’’وے میں چوری چوری‘‘ اور ’’اکھیاں نوں رہن دے‘‘ شامل ہیں۔ ان کی آواز کا جادو سرحدوں سے پار بھی پہنچا اور بالی ووڈ فلموں میں بھی ان کے گیت شامل کیے گئے۔
یہ بھی پڑھیں: امریکی عدالت کا ٹرمپ انتظامیہ کو دھچکا، ہارورڈ یونیورسٹی کے داخلوں کی تحقیقات سے متعلق مقدمہ خارج
حکومت پاکستان نے ان کی فنی خدمات کے اعتراف میں انہیں ستارہ امتیاز اور دیگر اعزازات سے نوازا۔ بلبلِ صحرا ریشماں 3 نومبر 2013 کو گلے کے سرطان کے باعث لاہور میں انتقال کر گئی تھیں، تاہم ان کی آواز اور لازوال گیت آج بھی مداحوں کے دلوں میں زندہ ہیں۔
