نیو یارک ( پاک ترک نیوز) فٹبال کی دنیا میں بعض کہانیاں حقیقت ہونے کے باوجود ناقابلِ یقین محسوس ہوتی ہیں۔ ایسی ہی ایک داستان نے دنیا بھر کے شائقین کو حیران کر دیا ہے۔ تقریباً دو دہائیاں قبل لیونل میسی نے ایک فلاحی فوٹو شوٹ کے دوران جس چھ ماہ کے بچے کو اپنی بانہوں میں اٹھا کر نہلایا تھا، آج وہی بچہ عالمی فٹبال کا ابھرتا ہوا سپر اسٹار بن چکا ہے اور ممکنہ ورلڈ کپ فائنل میں میسی کے سامنے کھڑا ہو سکتا ہے۔
یہ واقعہ 2007ء کا ہے، جب صرف 20 سالہ لیونل میسی نے یونیسیف، ایف سی بارسلونا اور ایک مقامی اخبار کی مشترکہ فلاحی مہم کے لیے ایک خصوصی فوٹو شوٹ میں حصہ لیا۔ اس شوٹ میں میسی نے ایک ننھے بچے کو نہلاتے ہوئے تصاویر بنوائیں، مگر اس وقت کسی نے بھی یہ تصور نہیں کیا تھا کہ یہی بچہ ایک دن دنیا بھر میں اپنی صلاحیتوں کا لوہا منوائے گا۔
فوٹوگرافر جان مونفورٹ کے مطابق میسی اس وقت خاصے شرمیلے تھے اور انہیں ابتدا میں یہ بھی معلوم نہیں تھا کہ اتنے چھوٹے بچے کو کس طرح سنبھالنا ہے۔ شوٹ مکمل ہونے پر مذاق میں کہا گیا کہ شاید میسی نے اس بچے کو اپنی کامیابی کی "برکت” دے دی ہے۔
وقت گزرتا گیا۔ لیونل میسی فٹبال کی تاریخ کے عظیم ترین کھلاڑیوں میں شمار ہونے لگے، جبکہ وہی ننھا بچہ، لامین یامال، غیرمعمولی صلاحیتوں کی بدولت دنیا کے بہترین نوجوان فٹبالرز میں شامل ہو گیا۔
یہ بھی پڑھیں: فیفا ورلڈ کپ کا فائنل اتوار کی رات، ارجنٹینا اور سپین آمنے سامنے ہونگے
اب قسمت نے ایک ایسا منظر تخلیق کیا ہے جس نے فٹبال شائقین کو جذباتی کر دیا ہے۔ اگر ارجنٹائن اور اسپین 2026ء فیفا ورلڈ کپ کے فائنل میں آمنے سامنے آئے تو لیونل میسی اور لامین یامال پہلی بار عالمی اعزاز کے سب سے بڑے مقابلے میں ایک دوسرے کے مخالف ہوں گے۔
ایک طرف برسوں کا تجربہ، بے شمار اعزازات اور ایک لیجنڈ کا سفر، جبکہ دوسری طرف نئی نسل کی امید، نوجوان جوش اور مستقبل کا روشن ستارہ۔ یہی وجہ ہے کہ شائقین اس ممکنہ مقابلے کو صرف ایک فائنل نہیں بلکہ "فٹبال کے ماضی اور مستقبل کی تاریخی ملاقات” قرار دے رہے ہیں۔
