نائیجر ( پاک ترک نیوز) نائیجیریا دنیا میں تیزی سے بڑھتی ہوئی لیتھیم کی طلب سے فائدہ اٹھانے کے لیے اہم پیش رفت کر رہا ہے۔ آسٹریلوی کمپنی کی حمایت سے جاری ایک بڑے منصوبے کے تحت ملک افریقہ میں لیتھیم پیدا کرنے والے نمایاں ممالک میں شامل ہونے کے قریب پہنچ گیا ہے۔
نائیجیریا کے مائننگ کیڈاسٹر آفس نے مزید لیتھیم تلاش کے لائسنسوں کی منتقلی کی منظوری دے دی ہے، جس سے آسٹریلوی کمپنی کی جانب سے گیارہ معدنی حقوق پر مشتمل پورٹ فولیو کے حصول کی راہ مزید ہموار ہو گئی
لیتھیم کو اس وقت دنیا کے اہم ترین معدنی وسائل میں شمار کیا جاتا ہے کیونکہ یہ الیکٹرک گاڑیوں کی بیٹریوں، قابلِ تجدید توانائی کے ذخیرہ جاتی نظام، اسمارٹ فونز، مصنوعی ذہانت کے انفراسٹرکچر اور جدید دفاعی ٹیکنالوجی میں بنیادی خام مال کے طور پر استعمال ہوتا ہے
حکام کے مطابق حالیہ منظوری کے تحت تین مزید ایکسپلوریشن لائسنس کو منتقل کیے جائیں گے، اس سے قبل بھی متعدد لائسنس منتقل کیے جا چکے ہیں، جبکہ ایک اور لائسنس کی منتقلی کی منظوری مارچ 2026 میں دی گئی تھی۔
یہ بھی پڑھیں: برکینا فاسو کی سابق نوآبادیاتی طاقت فرانس سے سفارتی تعلقات ختم
دوسری جانب نائیجیریا کی وزارتِ سالڈ منرلز ڈیولپمنٹ نے تین اسمال اسکیل مائننگ لیزز کو مکمل مائننگ لیز میں تبدیل کرنے کی درخواستیں بھی قبول کر لی ہیں۔ تاہم کان کنی کے باقاعدہ آغاز کے لیے ماحولیاتی منظوری، تکنیکی مطالعات، مالی وسائل اور دیگر قانونی تقاضے پورے کرنا ہوں گے۔
کوارا ریاست کے ضلع کائیاما میں واقع ایک اور ایکسپلوریشن لائسنس کی مدت میں مزید دو سال کی توسیع بھی کر دی گئی ہے، جبکہ کمپنی نے لائسنسوں کی تجدید، منتقلی اور دیگر ریگولیٹری تقاضوں کو پورا کرنے کے لیے اپنی مالی معاونت بھی بڑھا دی ہے۔
