کراچی (پاک ترک نیوز )بینک آف پنجاب کو بحرین میں اوورسیز ہول سیل بینکنگ یونٹ قائم کرنے کے لیے اسٹیٹ بینک آف پاکستان سے اصولی منظوری مل گئی ۔
بینک آف پنجاب کی جانب سے پاکستان اسٹاک ایکسچینج کو بھیجے گئے نوٹیفکیشن کے مطابق اسٹیٹ بینک نے 5 اگست 2026 کے خط کے ذریعے یہ اصولی منظوری دی ہے۔ اس سے قبل بینک نے 4 جولائی 2024 کو بھی اس منصوبے سے متعلق آگاہ کیا تھا۔
نوٹیفکیشن میں کہا گیا ہے کہ بحرین میں مجوزہ اوورسیز ہول سیل بینکنگ یونٹ کا قیام پاکستان اور بحرین کے متعلقہ ریگولیٹری اداروں سے تمام ضروری منظوریوں کے حصول سے مشروط ہوگا۔ اس کے علاوہ اسٹیٹ بینک کی مقرر کردہ تمام شرائط، قوانین اور ضوابط پر عمل درآمد بھی لازم ہوگا۔
بینک آف پنجاب کے مطابق بحرین میں بینکاری یونٹ اس وقت تک کام شروع نہیں کرے گا جب تک بحرین کے مرکزی بینک سے این او سی حاصل نہیں کر لیا جاتا اور اسٹیٹ بینک آف پاکستان کی جانب سے باقاعدہ بینکاری لائسنس جاری نہیں کر دیا جاتا۔
بینک کا کہنا ہے کہ تمام قانونی اور ریگولیٹری تقاضے پورے ہونے کے بعد بحرین میں بینکاری آپریشنز کا باقاعدہ آغاز کیا جائے گا۔
