مری ( پاک ترک نیوز) گلیات ڈویلپمنٹ اتھارٹی نے تھنڈیانی مربوط سیاحتی منصوبے کے تحت تقریباً 23 ارب روپے کی نجی سرمایہ کاری متوقع قرار دے دی، جبکہ منصوبے سے خیبر پختونخوا حکومت کو تقریباً 2 ارب 50 کروڑ روپے آمدن حاصل ہونے کا امکان ہے۔گلیات ڈویلپمنٹ اتھارٹی کے ڈائریکٹر جنرل محمد فواد کے مطابق تھنڈیانی میں تقریباً 400 کنال اراضی کو مربوط انداز میں سیاحتی مقاصد کے لیے ترقی دی جائے گی۔
منصوبے کے تحت جدید سیاحتی سہولیات اور بنیادی ڈھانچہ قائم کیا جائے گا، تاہم علاقے کے قدرتی ماحول، جنگلات اور پہاڑی منظرنامے کو محفوظ رکھنے پر خصوصی توجہ دی جائے گی۔حکام کے مطابق نجی سرمایہ کاری سے علاقے میں روزگار کے نئے مواقع پیدا ہوں گے اور مقامی سطح پر معاشی سرگرمیوں کو فروغ ملے گا۔گلیات میں ماحول کو نقصان پہنچانے اور بے ہنگم تعمیرات کی روک تھام کے لیے بھی اقدامات کیے گئے ہیں۔ گزشتہ ایک سال کے دوران کنکریٹ کی تعمیرات پر پابندی عائد کرکے مخصوص علاقوں میں پہلے سے تیار شدہ اور لکڑی سے بنے ڈھانچوں کی اجازت دی گئی ہے۔نئے تعمیراتی ضوابط 2026 کے تحت حساس ماحولیاتی اور سیاحتی علاقوں میں عمارتوں کی زیادہ سے زیادہ بلندی بھی کم کردی گئی ہے۔ پہلے سات منزلہ عمارتوں کی اجازت تھی، جسے اب پانچ منزل تک محدود کردیا گیا ہے۔
یہ بھی پڑیھیں: 26نومبر احتجاج کیس ،عمر ایوب سمیت 3ایم این ایز ااور 12ایم پی ایز کے وارنٹ گرفتاری جاری
سیاحتی مقامات پر ٹریفک کے دباؤ اور فضائی آلودگی میں کمی کے لیے برقی سیاحتی گاڑیاں بھی متعارف کرائی گئی ہیں۔
