کیلی فورنیا ( پاک ترک نیوز) خلائی ٹیکنالوجی کمپنی اسپیس ایکس کے شیئرز میں تقریباً 20 فیصد اضافہ ریکارڈ کیا گیا، جس کے بعد کمپنی کی مجموعی مالیت 2.5 ٹریلین ڈالر سے تجاوز کر گئی، جبکہ بانی ایلون مسک دنیا کے پہلے کھرب پتی بن گئے۔
رپورٹ کے مطابق اسپیس ایکس کے شیئرز پیر کو 19.7 فیصد اضافے کے ساتھ 192.8 ڈالر پر بند ہوئے۔ اس سے قبل جمعے کے روز کمپنی کے شیئرز نیسڈیک میں 135 ڈالر فی شیئر کے حساب سے ٹریڈ ہونا شروع ہوئے تھے اور پہلے ہی دن 19 فیصد اضافہ دیکھا گیا تھا۔
صرف دو دنوں میں ہونے والے اس غیرمعمولی اضافے کے بعد اسپیس ایکس دنیا کی چھ بڑی کمپنیوں میں شامل ہو گئی ہے، جبکہ اس کی مارکیٹ ویلیو کئی عالمی کمپنیوں سے آگے نکل گئی۔کمپنی کے ابتدائی عوامی شیئرز کی فروخت میں سرمایہ کاروں کی غیرمعمولی دلچسپی کے باعث انڈر رائٹر بینکوں نے "گرین شو آپشن” بھی استعمال کیا، جس کے تحت اضافی شیئرز فروخت کیے جا سکتے ہیں۔
اسپیس ایکس نے مجموعی طور پر تقریباً 639 ملین شیئرز فروخت کیے، جن میں 83 ملین سے زائد اضافی شیئرز بھی شامل تھے۔ اس طرح کمپنی نے 85.7 ارب ڈالر اکٹھے کیے، جو ابتدائی ہدف 75 ارب ڈالر سے کہیں زیادہ ہیں۔
یہ آئی پی او دنیا کی تاریخ کا سب سے بڑا آئی پی او قرار دیا جا رہا ہے۔ اس سے قبل 2019 میں Saudi Aramco نے تقریباً 29 ارب ڈالر جمع کر کے ریکارڈ قائم کیا تھا، جو اب ٹوٹ چکا ہے۔
ماہرین کے مطابق اسپیس ایکس کی شاندار کامیابی نہ صرف خلائی صنعت میں اس کی بڑھتی ہوئی اہمیت کو ظاہر کرتی ہے بلکہ عالمی سرمایہ کاروں کے اعتماد کا بھی ثبوت ہے۔ دوسری جانب ایلون مسک کی دولت میں ہونے والے بڑے اضافے نے انہیں تاریخ کا پہلا ٹریلین ڈالر مالیت رکھنے والا فرد بنا دیا ہے۔
