کراچی ( پاک ترک نیوز) کراچی میں کرپشن اور بدعنوانی کے خلاف سندھ ہائیکورٹ نے بڑا انتظامی اقدام اٹھاتے ہوئے سینئر سول جج ایاز علی کناسرو کو جبری ریٹائر کر دیا۔
چیف جسٹس سندھ ہائیکورٹ جسٹس ظفر راجپوت نے انکوائری اور حتمی سماعت کے بعد یہ فیصلہ سنایا۔ عدالتی کارروائی کے دوران سینئر سول جج ایاز علی کناسرو کے خلاف بدعنوانی کے الزامات ثابت ہونے کا ذکر کیا گیا۔
تفصیلات کے مطابق انکوائری آفیسر جسٹس شمس الدین عباسی نے کیس کی تفصیلی تحقیقات مکمل کیں، جبکہ مجاز اتھارٹی نے انہیں ملازمت سے برطرف کرنے کی سفارش کی تھی۔
یہ بھی پڑھیں: گریڈ 17میں بھرتیوں کے خلاف سندھ ہائیکورٹ کا فیصلہ معطل
چیف جسٹس سندھ ہائیکورٹ نے تمام شواہد، حقائق اور قانونی نکات کا جائزہ لینے کے بعد برطرفی کے بجائے جبری ریٹائرمنٹ کی سزا مقرر کی۔ سندھ ہائیکورٹ کا یہ حکم فوری طور پر نافذ العمل کر دیا گیا ہے۔
