اسلام آباد ( پاک ترک نیوز) پشاور میں پاکستان تحریک انصاف کی صوبائی پارلیمانی پارٹی نے چھ رکنی مذاکراتی کمیٹی قائم کرنے کا فیصلہ کرلیا، ذرائع کے مطابق فیصلہ گزشتہ رات ہونے والے اجلاس میں کیا گیا، جس میں 46 ارکان نے شرکت کی، پارٹی چیئرمین بیرسٹر گوہر بھی اجلاس میں شریک تھے۔
ذرائع کا کہنا ہے کہ مذاکراتی کمیٹی صوبے میں گورنر راج اور ایمرجنسی کے خاتمے کے لیے مذاکرات کرے گی۔ کمیٹی میں بیرسٹر گوہر، علی امین گنڈاپور اور نورالحق قادری شامل ہوں گے، جبکہ خیبرپختونخوا اسمبلی کے تین ارکان کو بھی کمیٹی کا حصہ بنایا جائے گا۔ذرائع کے مطابق علی امین گنڈاپور نے پارٹی کی جانب سے مذاکراتی کمیٹی کے باضابطہ اعلان کے بغیر مذاکرات کرنے سے معذرت کرلی۔ ان کا مؤقف تھا کہ حکومتی اعلامیے کے بغیر حکومت انہیں کس حیثیت سے قبول کرے گی؟
یہ بھی پڑھیں: پاک فوج کا افغان طالبان کی اشتعال انگیزی کا منہ توڑ جواب، متعدد چوکیاں تباہ
بیرسٹر گوہر نے 48 گھنٹوں میں کمیٹی کے باضابطہ اعلان کی یقین دہانی کرائی ہے۔دوسری جانب صوبائی پارلیمانی پارٹی نے بانی پی ٹی آئی، ان کی بہنوں اور سہیل آفریدی کی رہائی کو وفاقی پارلیمانی کمیٹی کی ذمہ داری قرار دیا ہے۔
