اسلام آباد ( پاک ترک نیوز) پاکستان کی چین کو برآمدات میں رواں سال نمایاں اضافہ ریکارڈ کیا گیا ہے۔ چین کی جنرل ایڈمنسٹریشن آف کسٹمز کے اعداد و شمار کے مطابق 2026 کے پہلے چھ ماہ کے دوران پاکستان نے چین کو ایک ارب 87 کروڑ 40 لاکھ ڈالر مالیت کی اشیا برآمد کیں، جو گزشتہ سال اسی عرصے کے ایک ارب 24 کروڑ 40 لاکھ ڈالر کے مقابلے میں 50.7 فیصد زیادہ ہیں۔
اعداد و شمار کے مطابق مارچ 2026 برآمدات کے حوالے سے سب سے بہتر مہینہ رہا، جب پاکستان نے چین کو 36 کروڑ 13 لاکھ 70 ہزار ڈالر کی برآمدات کیں، جو مارچ 2025 کے مقابلے میں 84.1 فیصد زیادہ ہیں۔
رپورٹ کے مطابق اس نمایاں اضافے میں پاکستان کے زرعی و صنعتی شعبے، خصوصاً چینی، بگاس (گنے کا بچا ہوا ریشہ) اور دیگر زرعی مصنوعات نے اہم کردار ادا کیا۔ پاکستانی برآمد کنندگان نے چینی ملوں، ڈسٹلریز اور صنعتی اداروں کو خام مال اور نیم تیار مصنوعات کی فراہمی میں نمایاں اضافہ کیا، جس سے دونوں ممالک کے درمیان تجارتی روابط مزید مضبوط ہوئے۔
یہ بھی پڑھیں: دنیا کا سب سے بڑا سبز انقلاب،66ارب درخت ،چین سب پر بازی لے گیا
پاکستان کی وزارتِ تجارت کے ایک سینئر عہدیدار کے مطابق چین کے ساتھ صنعتی شراکت داری اب زیادہ مستحکم ہو چکی ہے اور پاکستانی برآمد کنندگان توانائی اور مینوفیکچرنگ کے شعبوں میں چین کے قابلِ اعتماد سپلائر بن کر ابھرے ہیں، خاص طور پر چینی کی پروسیسنگ اور بایو ماس کے شعبے میں۔
رپورٹ میں یہ بھی بتایا گیا ہے کہ بینکاری نظام میں بہتری نے برآمدات کے فروغ میں اہم کردار ادا کیا ہے۔ پاکستانی برآمد کنندگان کو اب چینی بینکوں کے ذریعے لیز فنانس، آسان قرضوں اور توسیع شدہ کریڈٹ سہولیات تک بہتر رسائی حاصل ہو رہی ہے، جس سے دونوں ممالک کے درمیان تجارتی سرگرمیوں کو مزید تقویت مل رہی ہے۔
