واشنگٹن ( پاک ترک نیوز) امریکا نے اپنے ویزا ویور پروگرام سے متعلق نئی ہدایات جاری کرتے ہوئے واضح کیا ہے کہ بعض ممالک کا سفر کرنے والے یا ان ممالک کی دوہری شہریت رکھنے والے افراد اب ویزا فری امریکا میں داخلے کے اہل نہیں ہوں گے۔
ویزا ویور پروگرام کے تحت شامل ممالک کے شہری سیاحت یا کاروبار کی غرض سے 90 روز تک امریکا بغیر ویزا سفر کر سکتے ہیں، تاہم روانگی سے قبل الیکٹرانک سسٹم فار ٹریول اتھورائزیشن سے منظوری لینا لازمی ہوتی ہے۔
امریکی حکومت کے مطابق مسافروں کو اب ویزا فری سہولت کے بجائے باقاعدہ امریکی ویزا حاصل کرنا ہوگا۔ اگر ویزا ویور پروگرام میں شامل کسی ملک کا شہری یکم مارچ 2011 یا اس کے بعد درج ذیل ممالک کا سفر کر چکا ہے تو وہ ویزا فری سہولت استعمال نہیں کر سکے گا۔
ان ممالک میں شمالی کوریا ،ایران ،عراق ،لیبیا ،صومالیہ ،سوڈان ،شام ،یمن شامل ہیں ۔اس کے علاوہ 12 جنوری 2021 یا اس کے بعد کیوبا کا سفر کرنے والے افراد بھی ویزا ویور پروگرام کے اہل نہیں رہیں گے، سوائے چند سفارتی یا سرکاری استثنائی معاملات کے۔
امریکا نے واضح کیا ہے کہ اگر ویزا ویور پروگرام میں شامل کسی ملک کا شہری درج ذیل ممالک میں سے کسی ایک کی بھی شہریت رکھتا ہے تو اسے امریکا جانے کے لیے لازماً امریکی ویزا حاصل کرنا ہوگا ،ان ممالک میں کیوبا ،شمالی کوریا ،ایران ،عراق ،سوڈان ،شام شامل ہیں ۔
امریکی حکام کے مطابق ایسے تمام متاثرہ مسافروں کو امریکا جانے سے قبل قریبی امریکی سفارت خانے یا قونصل خانے سے وزیٹر بی ویزا حاصل کرنا ہوگا۔
البتہ جو مسافر اب بھی ویزا ویور پروگرام کے اہل ہیں، انہیں سفر سے قبل ESTA کی منظوری لینا اور پروگرام کی دیگر تمام شرائط، بشمول 90 روزہ قیام کی حد، پوری کرنا ہوگی۔
