پاکستان میں باسمتی چاول کی نئی تاریخ رقم، سب سے لمبے دانے والی نئی قسم متعارف

لاہور:(پاک ترک نیوز)پاکستان میں باسمتی چاول کی نئی قسم نے دانے کی لمبائی کا ریکارڈ قائم کر دیا۔ رائس ریسرچ انسٹیٹیوٹ (RRI) کے سائنس دانوں نے باسمتی چاول کی ایک نئی قسم تیار کر لی ہے جس کا دانہ پاکستان میں اب تک کا سب سے لمبا قرار دیا جا رہا ہے۔
اس نئی قسم کی دانے کی لمبائی 9.66 ملی میٹر ہے، جو عالمی معیار کی پریمیم رائس مارکیٹس میں پاکستان کی پوزیشن کو مزید مضبوط بنانے میں مدد دے سکتی ہے۔ رائس ریسرچ انسٹیٹیوٹ، کالا شاہ کاکو کے سینئر سائنس دان ڈاکٹر عثمان سلیم نے ویلتھ پاکستان سے گفتگو کرتے ہوئے بتایا کہ“2025 میں تیار کی گئی نئی قسم ’سلطان سپر باسمتی‘ دانے کی لمبائی کے اعتبار سے پاکستان کی تمام سابقہ باسمتی اقسام سے آگے ہے۔”
انہوں نے بتایا کہ پکانے کے بعد اس چاول کا دانہ 20 ملی میٹر تک لمبا ہو جاتا ہے، جو ایک نایاب خصوصیت ہے اور بین الاقوامی خریداروں کے لیے اسے خاص طور پر پرکشش بناتی ہے۔
اس نئی قسم کی پیداوار بھی نمایاں طور پر زیادہ ہے، جو 77 من فی ایکڑ تک جا سکتی ہے، جبکہ موجودہ باسمتی اقسام کی اوسط پیداوار تقریباً 45 من فی ایکڑ ہے۔
اس سے قبل 2023 میں رائس ریسرچ انسٹیٹیوٹ نے سونا سپر باسمتی تیار کی تھی، جس کے دانے کی لمبائی 9.5 ملی میٹر تھی اور وہ اس وقت تک سب سے لمبی قسم سمجھی جاتی تھی۔
اس سے پہلے کائنات باسمتی کو سب سے لمبا دانہ رکھنے والی قسم تصور کیا جاتا تھا، جس کی لمبائی 8.26 ملی میٹر تھی۔
تاہم سائنس دانوں کے مطابق کائنات باسمتی دراصل خالص باسمتی نہیں بلکہ ایک باریک چاول کی قسم ہے جس میں باسمتی جیسی خوشبو پائی جاتی ہے۔
ڈاکٹر عثمان سلیم کے مطابق سلطان سپر باسمتی میں خالص اور روایتی باسمتی خوشبو کے ساتھ بہترین پکانے کی خصوصیات موجود ہیں۔انہوں نے کہا،“یہ چاول یکساں طور پر پک جاتا ہے اور دانے کی لمبائی برقرار رکھتا ہے۔
اگرچہ یہ قدرے دیر سے کاشت کی جانے والی قسم ہے، تاہم اس کی برداشت کا وقت دیگر عام باسمتی اقسام کے قریب ہی ہے۔”انہوں نے مزید بتایا کہ ادارہ اس وقت باسمتی کی مزید تین نئی اقسام پر کام کر رہا ہے، جن کے آئندہ دو سے تین سال میں جاری ہونے کی امید ہے۔
اب تک رائس ریسرچ انسٹیٹیوٹ 33 اعلیٰ پیداوار دینے والی باریک اور موٹی اقسام تیار کر چکا ہے، جن میں باسمتی 385، سپر باسمتی، سپر گولڈ اور چناب شامل ہیں۔
چاول برآمد کرنے والوں نے اس پیش رفت کو خوش آئند قرار دیا ہے۔ رائس ایکسپورٹرز ایسوسی ایشن آف پاکستان (REAP) کے سابق سینئر وائس چیئرمین توفیق احمد خان کا کہنا ہے کہ“اضافی لمبے دانے والا چاول عالمی منڈی میں بے حد پسند کیا جاتا ہے، تاہم برآمدی کامیابی کے لیے ضروری ہے کہ کسان اس نئی قسم کو جلد اپنائیں۔”