اسلام آباد(پاک ترک نیوز) محکمہ موسمیات نے ملک کے بالائی علاقوں میں مزید بارشوں کی پیش گوئی کرتے ہوئے شہریوں اور متعلقہ اداروں کو محتاط رہنے کی ہدایت کی ہے۔ محکمہ موسمیات کے مطابق مون سون ہوائیں ملک کے بالائی علاقوں میں داخل ہورہی ہیں جبکہ مغربی ہواؤں کا سلسلہ بھی بالائی علاقوں پر اثر انداز ہے، جو 4 اور 5 ستمبر کو مزید شدت اختیار کرسکتا ہے۔
محکمہ موسمیات کے مطابق اس موسمی نظام کے زیرِ اثر 3 سے 6 ستمبر کے دوران مختلف علاقوں میں وقفے وقفے سے بارش، تیز ہواؤں اور گرج چمک کے ساتھ بارش کا سلسلہ جاری رہنے کا امکان ہے، جبکہ بعض مقامات پر موسلادھار اور کہیں انتہائی موسلادھار بارش بھی ہوسکتی ہے۔کشمیر کے نیلم وادی، مظفرآباد، راولاکوٹ، پونچھ، ہٹیاں، باغ، حویلی، سدھنوتی، کوٹلی، بھمبر اور میرپور میں 3 سے 6 ستمبر کے دوران وقفے وقفے سے بارش، تیز ہواؤں اور گرج چمک کے ساتھ بارش متوقع ہے۔اسلام آباد، راولپنڈی، مری، گلیات، جہلم، چکوال، تلہ گنگ، اٹک، لاہور، سیالکوٹ، شیخوپورہ، نارووال، منڈی بہاؤالدین، گجرات، گوجرانوالہ، وزیرآباد، حافظ آباد اور قصور میں 3 سے 5 ستمبر کے دوران بارش، تیز ہواؤں اور گرج چمک کے ساتھ بارش متوقع ہے۔
یہ بھی پڑھیں: راولپنڈی اسلام آباد میں دوسرے روز بھی موسلادھار بارش، متعدد علاقے زیر آب
محکمہ موسمیات کے مطابق بعض اوقات بارش موسلادھار سے انتہائی موسلادھار بھی ہوسکتی ہے۔اوکاڑہ، ننکانہ صاحب، سرگودھا، خوشاب، میانوالی، نورپور تھل، فیصل آباد، جھنگ، ٹوبہ ٹیک سنگھ، لیہ، بھکر، ساہیوال اور ڈیرہ غازی خان سمیت گردونواح میں 4 اور 5 ستمبر کو وقفے وقفے سے بارش کا امکان ہے۔خیبر پختونخوا کے پشاور، دیر، چترال، سوات، کوہستان، مالاکنڈ، مردان، نوشہرہ، چارسدہ، صوابی، شانگلہ، بٹگرام، بونیر، کوہاٹ، ہنگو، کرم، باجوڑ، مہمند، خیبر، اورکزئی، مانسہرہ، ایبٹ آباد، ہری پور، کرک، ٹانک، لکی مروت، ڈیرہ اسماعیل خان، بنوں اور وزیرستان میں 3 ستمبر کی شام یا رات سے 5 ستمبر تک بارش اور گرج چمک کے ساتھ بارش متوقع ہے۔
محکمہ موسمیات کے مطابق خیبر پختونخوا کے مختلف علاقوں میں بارش موسلادھار اور بعض مقامات پر انتہائی موسلادھار ہوسکتی ہے۔گلگت بلتستان کے دیامر، استور، غذر، اسکردو، ہنزہ، گلگت، غانچے اور شگر میں 3 سے 6 ستمبر تک بارش، تیز ہواؤں اور گرج چمک کے ساتھ بارش متوقع ہے۔بعض مقامات پر درمیانی شدت کی بارش کے ساتھ موسلادھار بارش بھی ہوسکتی ہے۔محکمہ موسمیات کے مطابق پیش گوئی کی مدت کے دوران سندھ اور بلوچستان کے بیشتر علاقوں میں موسم بنیادی طور پر گرم اور مرطوب رہنے کا امکان ہے۔
تاہم بلوچستان کے ژوب، بارکھان، موسیٰ خیل اور گردونواح میں بارش، تیز ہواؤں اور گرج چمک کے ساتھ بارش ہوسکتی ہے۔محکمہ موسمیات کے مطابق بارشوں کے اس نئے سلسلے کے دوران شہری اور متعلقہ ادارے احتیاطی تدابیر اختیار کریں، جبکہ پہاڑی علاقوں میں رہنے والے افراد موسمی صورتحال پر نظر رکھیں۔
