اسلام آباد ( پاک ترک نیوز) جڑواں شہروں راولپنڈی اور اسلام آباد میں دوسرے روز بھی موسلادھار بارش ہوئی جس کے باعث تمام اداروں کو ہائی الرٹ رہنے کی ہدایت کر دی گئی۔اسلام آباد اور راولپنڈی میں میں آج ہونے والی شدید بارش کے نتیجے میں نشیبی علاقوں میں پانی جمع ہو گیا۔ نالہ لئی میں کٹاریاں کے مقام پر پانی کی سطح 11 فٹ پر پہنچ گئی۔راولپنڈی اور اسلام آباد میں اوسط بارش 16 ملی میٹر ریکارڈ کی گئی، سید پور میں 45، ایچ ایٹ میں 30 ، نیوکٹاریاں 12، پیرودھائی 4 اور شمس آباد میں 2 ملی میٹر بارش ریکارڈ کی گئی۔
گزشتہ روز بھی راولپنڈی میں 230 ملی میٹر بارش کے بعد گلیاں اور سڑکیں ندی نالوں میں تبدیل ہو گئی تھیں، نشیبی علاقوں میں پانی گھروں میں داخل ہو گیا تھا۔ جبکہ کئی گاڑیاں بھی پانی میں ڈوب گئی تھیں۔ جڑواں شہروں میں کئی مقامات پر ٹریفک کا نظام بھی درہم برہم ہو گیا تھا۔نیشنل ڈیزاسٹر مینجمنٹ اتھارٹی کے ایکسپرٹ طیب شاہ نے بتایا کہ اسلام آباد اور چکلالہ میں آج زیادہ بارش ریکارڈ ہوئی، ملک کے بیشتر حصوں میں بارشیں 7 ستمبرتک جاری رہیں گی، 4 ستمبر کو اسلام آباد اور راولپنڈی میں بارش کا نیا سلسلہ شروع ہو گا، اسلام آباد اور راولپنڈی میں 4 ستمبر کو متوقع تیز بارش سے متعلق الرٹ جاری کیا گیا ہے۔
یہ بھی پڑھیں: خیبر پختونخوا میں بارشوں سے حادثات، 2 افراد جاں بحق، 3 زخمی
راولپنڈی کی انتظامیہ نے رین ایمرجنسی نافذ کرتے ہوئے اسکولوں میں تعطیل کا اعلان کر دیا تھا۔ جبکہ اسلام آباد کے متعدد اسکول بھی بند کرکے آن لائن کلاسز کا انتظام کیا گیا۔
